Byrjaður að æfa en má það ekki

Sænski knattspyrnumaðurinn Pawel Cibicki hefur hafið æfingar með sænska úrvalsdeildarliðinu Värnamo. Það má Cibicki hins vegar ekki þar sem hann er enn í keppnisbanni eftir að hafa gerst sekur um veðmálasvindl.

Alþjóðaknattspyrnusambandið, FIFA, úrskurðaði Cibicki á sínum tíma í fjögurra ára keppnisbann eftir að sænska knattspyrnusambandið hafði gert slíkt hið sama nokkrum mánuðum fyrr.

Frétt af mbl.is

Úrskurðaður í fjögurra ára keppnisbann

Bannið rennur sitt skeið 1. febrúar næstkomandi en þrátt fyrir það er hann mættur til æfinga. Því hefur sænska sambandið komið á fót rannsókn.

„Í ljósi frétta gærdagsins um að Pawel Cibicki æfi með IFK Värnamo hefur sænska knattspyrnusambandið komið á fót rannsókn þennan miðvikudag þar sem gengið verður úr skugga um hvort brotið hafi verið gegn skilyrðum leikbanns sem kom til vegna brota á reglum sambandsins um veðmál,“ sagði í tilkynningu frá sænska knattspyrnusambandinu.

Fékk viljandi gult spjald

Málið laut að því að Cibicki fékk vilj­andi gult spjald í leik með Elfs­borg gegn Kalm­ar í sænsku úr­vals­deild­inni árið 2019 og fékk greitt fyr­ir. Þá lék hann sem lánsmaður frá enska fé­lag­inu Leeds United.

Upp­hæðin sem Cibicki fékk greidda, um 4,3 millj­ón­ir ís­lenskra króna, sagði hann sjálf­ur að hafi ein­fald­lega verið lán.

Skömmu áður en leik­ur Kalm­ars og Elfs­borg hófst voru 27 nýir veðmála­reikn­ing­ar stofnaðir og áttu þeir það all­ir sam­eig­in­legt að veðja á að Cibicki myndi fá gult spjald í leikn­um.

Auk leikbanns var hann dæmdur í tveggja ára skilorðsbundið fangelsi fyrir sinn hlut í málinu.

• Blogga um frétt