Íþróttir | Fótbolti | mbl | 29.1.2025 | 11:59 | Uppfært 12:56

Stórlið geta fallið úr keppni í kvöld

París SG vann Manchester City 4:2 í sjöundu umferð en bæði þessi stórlið eiga á hættu að falla úr keppni í kvöld. AFP/Thomas Samson

Talsverð spenna er fyrir lokaumferðina í deildarkeppni Meistaradeildar karla í fótbolta en allir átján leikirnir í áttundu og síðustu umferðinni hefjast klukkan 20.00 í kvöld.

Keppt er í fyrsta sinn eftir nýju fyrirkomulagi þar sem 36 lið leika í einni deild, spila átta leiki hvert við átta mismunandi lið, og stigafjöldinn ræður, ásamt markamismun þegar með þarf, um endanleg sæti.

Efstu átta liðin fara beint í 16-liða úrslit.

Liðin í 9. til 24. sæti fara í umspil um sæti í 16-liða úrslitum.

Tólf neðstu liðin, frá sæti 25 og niður úr, hafa lokið keppni.

Stöðuna má sjá hér til hliðar (smellið á „meira“ til að sjá ítarlegri stöðu) en fyrir leiki kvöldsins eru það aðeins Liverpool og Barcelona sem eru örugg með sæti í 16-liða úrslitum.

Þessi lið eru örugg með að vera að minnsta kosti meðal 24 efstu liða og fara í umspil eða beint í 16-liða úrslit: Arsenal, Inter Mílanó, Atlético Madrid, AC Milan, Atalanta, Leverkusen, Aston Villa, Mónakó, Feyenoord, Lille, Brest, Dortmund, Bayern München, Real Madrid, Juventus og Celtic.

Þessi lið eru í baráttu um að komast áfram: PSV Eindhoven, Club Brugge, Benfica, París SG, Sporting Lissabon, Stuttgart, Manchester City, Dinamo Zagreb, Shakhtar Donetsk.

Þessi lið eru úr leik: Bologna, Sparta Prag, RB Leipzig, Girona, Rauða stjarnan, Sturm Graz, Salzburg, Slovan Bratislava og Young Boys.

Baráttan um að komast áfram er því á milli níu liða og sex þeirra munu fara í umspilið. Í þeim hópi er Manchester City, sem er í 25. sæti og verður að vinna Club Brugge á heimavelli, annars er liðið úr leik.

París SG. er í 22. sæti og sækir Stuttgart heim til Þýskalands og það er nánast hreinn úrslitaleikur um hvort liðanna kemst áfram.

Aðeins tveir leikir af átján í kvöld skipta engu máli, það er að segja tveir þeir neðstu á listanum hér fyrir neðan, en leikirnir í kvöld eru þessir:

PSV Eindhoven - Liverpool
Barcelona - Atalanta
Girona - Arsenal
Inter Mílanó - Mónakó
Salzburg - Atlético Madrid
Dinamo Zagreb - AC Milan
Leverkusen - Sparta Prag
Aston Villa - Celtic
Lille - Feyenoord
Brest - Real Madrid
Dortmund - Shakhtar Donetsk
Bayern München - Slovan Bratislava
Juventus - Benfica
Manchester City - Club Brugge
Sporting Lissabon - Bologna
Stuttgart - París SG
Sturm Graz - RB Leipzig
Young Boys - Rauða stjarnan