Íþróttir | mbl | 29.12.2012 | 12:04

Innlendur íþróttaannáll í myndum

Mynd 1 af 24 Í október tryggði íslenska kvennalandsliðið í knattspyrnu sér keppnisréttinn á EM eftir sigur á Úkraínu í umspili. Hér fagnar Jóhanna Sigurðardóttir forsætisráðherra með frænku sinni Dóru María Lárusdóttur. Ómar Óskarsson

Mynd 2 af 24 Íslenska karlalandsliðið í handknattleik endaði í 10. sæti í úrslitakeppni EM í Serbíu í janúar. Hér ræðast þeir Guðmundur Þórður Guðmundsson og Óskar Bjarni Óskarsson við. Kristinn Ingvarsson

Mynd 3 af 24 Valur varð bikarmeistari í kvennaflokki í febrúar eftir sigur á ÍBV í úrslitaleik. Árni Sæberg

Mynd 4 af 24 Í ágústmánuði tryggði Stjarnan sér sigur í bikarkeppni kvenna í knattspyrnu eftir sigur á Val í úrslitaleik í Laugardalnum. Sigurgeir Sigurðsson

Mynd 5 af 24 Valur varði Íslandsmeistaratitil sinn í kvennaflokki í handknattleik eftir sigur á Fram í úrslitaeinvígi í maímánuði. Eggert Jóhannsson.

Mynd 6 af 24 HK-ingar tryggðu sér sinn fyrsta Íslandsmeistaratitil í handknattleik karla í maímánuði þegar þeir lögðu FH-inga í úrslitaeinvígi. Árni Sæberg

Mynd 7 af 24 Haukar voru krýndir bikarmeistarar í karlaflokki í handknattleik í febrúar en þeir höfðu betur gegn Fram í úrslitaleik í Laugardalshöllinni. Árni Sæberg

Mynd 8 af 24 Grindvíkingar hömpuðu Íslandsmeistaratitlinum í körfuknattleik karla eftir sigur á Þór Þorlákshöfn í úrslitaeinvígi sem lauk í apríl. Árni Sæberg

Mynd 9 af 24 Njarðvíkingar urðu Íslandsmeistarar í körfuknattleik í fyrsta sinn og þetta var árið þeirra því Njarðvík vann einnig bikarmeistaratitilinn Golli

Mynd 10 af 24 Sigurður Ingimundarson þjálfari Keflavíkinga lyftir bikarnum á loft eftir sigur keflvíkinga á Tindastóli í úrslitaleik bikarkeppninnar. Kristinn Ingvarsson

Mynd 11 af 24 Kylfingurinn Haraldur Franklín átti frábæru gengi að fagna á árinu en hann varð Íslandsmeistari bæði í höggleik og í holukeppni Golfsambandið

Mynd 12 af 24 Valdís Þóra Jónsdóttir hrósaði sigri á Íslandsmótinu í höggleik í sumar. Golfsambandið

Mynd 13 af 24 FH-ingar áttu besta lið landsins í karlaflokki í knattspyrnu á árinu og í lok september voru þeir krýndir Íslandsmeistarar. Gunnleifur Gunnleifsson fyrirliði liðsins hampar hér Íslandsmeistaratitlinum. Golli

Mynd 14 af 24 KR-ingar voru í ágústmánuði krýndir bikarmeistarar í knattspyrnu karla annað árið í röð eftir 2:1 sigur á Stjörnunni í spennandi úrslitaleik á Laugardalsvelli. Sigurgeir Sigurðsson

Mynd 15 af 24 Hlaupakonan Aníta Hinriksdóttir lét heldur betur kveða að sér hlaupabrautinni á árinu en þessi 16 ára gamli ÍR-ingur sýndi og sannaði að hún er mesta efni Íslendinga í hlaupum. Aníta bætti í sumar 29 ára gamalt met Ragnheiðar Ólafsdóttur í 800 metra hlaupi utanhúss og í desember bætti hún 34 ára gamalt Íslandsmet Lilju Guðmundsdóttur í 1000 metra hlaupi innanhúss. Þá hafnaði hún í 4. sæti á HM unglinga í 800 metra hlaupi sem fram fór í Barcelona. Ómar Óskarsson

Mynd 16 af 24 Í september skráði Þór/KA sig í sögubækur fótboltans hér á landi þegar liðið vann sinn fyrsta Íslandsmeistaratitil í knattspyrnu kvenna. Það braust út gífurlegur fögnuður fyrir norðan en fáir höfðu spáð norðankonum titlinum. Skapti Hallgrímsson

Mynd 17 af 24 ÍR-ingar voru sigursælir í frjálsum íþróttum á árinu. Í bikarkeppni FRÍ á Akureyri unnu ÍR-ingar þrefalt en þeir unnu bæði í karla- og kvennaflokki og samanlagt. ÍR-ingarnir fylgdu þessum sigri eftir með því að bera sigur úr býtum á Meistaramótinu sem fram fór á Laugardalsvellinum. Hér er sigursveit ÍR í 4x100 metra boðhlaupi sem varð Íslandsmeistari en sveituna skipuðu Aníta Hinriksdóttir, Arna Stefanía Guðmundsdóttir, Björg Gunnarsdóttir og Kristín Birna Ólafsdóttir. Ómar Óskarsson

Mynd 18 af 24 Júlían Karl Jóhannsson og Auðunn Jónsson fögnuðu báðir heimsmeistaratitli í réttstöðulyftu á árinu. Í september varð Júlían Jóhann heimsmeistari unglinga á HM sem fram fór í Hollandi. Auðunn varð heimsmeistari á HM karla sem haldið var í Púertó Ríkó í byrjun nóvember. Golli

Mynd 19 af 24 Aðalheiður Rósa Harðardóttir stóð sig virkilega vel á heimsmeistaramótinu í karate sem haldið var í París í Frakklandi í nóvember. Aðalheiður endaði í 9.-16. sæti í einstaklingskata en keppendur voru 51 talsins. Kristinn Ingvarsson

Mynd 20 af 24 Aron Kristjánsson var í ágústmánuði ráðinn þjálfari karlalandsliðsins í handknattleik en Guðmundur Þórður Guðmundsson hætti með liðið eftir Ólympíuleikana. Aron hefur byrjað vel en Ísland hefur unnið báða leiki sína í undankeppni EM. Liðið lagði H-Rússa, 36:28, í Laugardalshölli og hrósaði svo sigri á útivelli gegn Rúmenum, 37:30. Fyrsta stóra verkefni Arons með landsliðið verður svo í janúar en úrslitakeppni HM fer fram á Spáni og þar verða Íslendingar á meðal þátttökuþjóða. Ómar Óskarsson

Mynd 21 af 24 Unglingalandsliðið í hópfimleikum tryggði sér Evrópumeistaratitilinn í Árósum í október á glæsilegan hátt. Fimleikasambandið

Mynd 22 af 24 Kvennalandsliðið í hópfimleikum fór frægðarför til Árósa í Danmörku í október en liðið gerði sér lítið fyrir og tryggði sér Evrópumeistaratitilinn. Fimleikasambandið

Mynd 23 af 24 Víkingur Ólafsvík tryggði sér sæti í efstu deild karla í knattspyrnu í fyrsta sinn í sögu félagsins.

Mynd 24 af 24 Íslenska kvennalandsliðið í handknattleik fékk óvænt sæti í úrslitakeppni Evrópumótsins sem haldið var í Serbíu í desember. Við ramman reip var að draga hjá íslenska liðinu en það tapaði öllum leikjum sínum í riðlinum og endaði 15. sæti af 16 liðum. Hér er fyrirliðinn Hrafnhildur Ósk Skúladóttir.

Þór/KA Íslandsmeistari varð Íslandsmeistari knattspyrnu kvenna í fyrsta sinn. Arna Sif Ásgrímsdóttir fyrirliði gleðst hér yfir titlinum. mbl.is

Það var í nógu í snúast hjá íslensku íþróttafólki á árinu sem er að líða og mörg góð afrek voru unnin.

Bæði karla- og kvennalandsliðin í handbolta kepptu í úrslitakeppni Evrópumótsins en bæði mótin fóru fram í Serbíu. Karlaliðið endaði í 10. sæti en kvennaliðið í 15. sæti.

HK fagnaði sínum fyrsta Íslandsmeistaratitli í handbolta karla og lið Þórs/KA vann Íslandsmeistaratitilinn í fyrsta sinn í kvennaflokki í knattspyrnu.

Kvennalandsliðið í hópfimleikum fór frægðarför til Árósa í Danmörku í október en liðið gerði sér lítið fyrir og tryggði sér Evrópumeistaratitilinn. Það sama gerði unglingalandsliðið í hópfimleikum í keppninni.

Með því að smella á renninginn hér að ofan má sjá ítarlega myndasyrpu af mörgu því sem fyrir augu bar í íslensku íþróttalífi.

Sjá einnig grein og myndasyrpu um Íslendinga á Ólympíuleikunum: Íslandsmet en engin verðlaun