Hrafnhildur Lúthersdóttir bætti verulega eigið Íslandsmet í 100 m bringusundi í undanrásum á heimsmeistaramótinu í sundi í 25 m laug í Doha í morgun. Hún synti á 1.06,26 mínútum og hafnaði í 22. sæti af 58 keppendum.
Fyrra met Hrafnhildar í greininni var 1.06,78. Hrafnhildur er greinilega í góðri æfingu um þessar mundir því í fyrradag hjó hún nærri eigin Íslandsmeti í 50 m bringusundi á mótinu.
Hrafnhildi vantaði einungis 14/100 úr sek. til að komast í undanúrslit.
Keppnin var greinilega mjög hörð því þjár stúlkur þurfa að synda umsund (swim off) til að ákvarða hver þeirra verði sú sextánda og síðasta inn í undanúrslit. Stúlkurnar syntu allar á 1.06,13.