Eygló Ósk bætti eigið Íslands- og Norðurlandamet

Eygló Ósk Gústafsdóttir var nú rétt í þessu að bæta eigið Íslandsmet í 200 metra baksundi þegar hún kom í mark á tímanum 2:09,36 mínútum á Íslandsmeistaramótinu í Laugardalslaug. Það er jafnframt bæting á hennar eigin Norðurlandameti.

Eygló hafði sett Íslandsmet í greininni á danska meistaramótinu á dögunum, þegar hún kom í mark á tímanum 2:09,86 mínútum og var það undir lágmarki inn á Ólympíuleika sem og heimsmeistaramótið í sumar. Fyrir helgina var Eygló í sjöunda sæti á heimslistanum og þetta ætti að færa hana þar enn ofar.

Önnur í sundinu var Íris Ósk Hilmarsdóttir og þriðja Eydís Ósk Kolbeinsdóttir.

Í karlaflokki varð Kristinn Þórarinsson Íslandsmeistari en hann kom í mark á tímanum 2:07,59 mínútum. Annar varð Bragi Snær Hallsson á tímanum 2:09,12 mínútum og þriðji varð Kolbeinn Hrafnkelsson á tímanum 2:11,20.

Þá setti Brynjólfur Óli Karlsson aldursflokkamet þegar hann kom í mark á tímanum 2:14,65 mínútum.

Eygló Ósk í metsundi sínu í dag. mbl.is/Eva Björk

• Blogga um frétt