Hjördís og Hákon þríþrautarfólk ársins

Hjördís Ýr Ólafsdóttir og Hákon Hrafn Sigurðsson hafa verið valin þríþrautarfólk ársins af Þríþrautarsambandi Íslands.

Hjördís Ýr Ólafsdóttir (34 ára úr Sundfélagi Hafnafjarðar) kom heim til Íslands á árinu eftir að hafa æft og keppt í þríþraut í Ástralíu í þrjú ár. Hún varð bikarmeistari Þríþrautarsambandsins og Íslandsmeistari í sprettþraut og í ólympískri þríþraut. Þá hafnaði hún í 2. sæti í áhugamannaflokki í Challenge Iceland (1,9km sund, 90km hjól, 21,1km hlaup) en sú keppni er hluti af alþjóðlegri mótaröð í lengri vegalengdum í þríþraut. Hún mun keppa á heimsmeistaramóti Challenge mótaraðarinnar á næsta ári í Slóvakíu.

Hákon Hrafn Sigurðsson (42 ára úr Breiðabliki) hefur verið í fremstu röð í þríþraut undanfarin ár og þetta er 5. árið í röð sem hann er valinn þríþrautarmaður ársins. Hann varð bikarmeistari Þríþrautarsambandsins og Íslandsmeistari í ólympískri þríþraut og í hálfum járnmanni. Þá vann hann áhugamannaflokkinn í Challenge Iceland (1,9km sund, 90km hjól, 21,1km hlaup) og mun keppa á heimsmeistaramóti Challenge mótaraðarinnar á næsta ári í Slóvakíu.

• Blogga um frétt