Íþróttir | mbl | 16.3.2019 | 18:40 | Uppfært 19:50

Tuttugu og einn titill í hús

Leikmenn SA fagna 21. Íslandsmeistaratitli félagsins. Ljósmynd/Þórir Tryggvason

Þriðja leiknum í úrslitaeinvíginu um Íslandsmeistaratitilinn í íshokkí karla lauk í dag á Akureyri þar sem SA og SR áttust við en leiknum lauk með 4:1-sigri SA. SR-ingar urðu að vinna leikinn til að framlengja einvígi liðanna um Íslandsmeistaratitilinn en staðan var 2:0 í unnum leikjum þegar flautað var til leiks í dag.

Heimamenn voru ekkert á þeim buxunum að hleypa SR-ingum að borðinu og þeir unnu góðan sigur. SA var að landa sínum tuttugasta titli á 28 árum. Akureyringar eru vel að titlinum komnir en þeir unnu SR tíu sinnum í ellefu leikjum liðanna í deildar- og úrslitakeppninni í vetur. Allt var með kyrrum kjörum framan af fyrsta leikhlutanum og það voru SR-ingar sem voru kraftmeiri og þeir sköpuðu sér nokkur færi.

Var þetta lognið á undan storminum því á lokamínútum leikhlutans rigndi mörkum. SA komst í 2:0 með mörkum skoruðum með innan við mínútu millibili. Fyrrra markið skoraði Jordan Steger með sakleysislegu skoti en seinna markið var þruma upp í skeytin frá Thomas Stuart-Dant. SR-ingar blésu strax í herlúðra og sóttu án afláts þar til pökkurinn lá í neti SA-marksins. Aron Knútsson átti gott skot sem virtist á leið í stöngina eða fram hjá marki SA. Adam Beukeboom ákvað þó að grípa pökkinn en það vildi ekki betur til en svo að hann misreiknaði sig og pökkurinn lak í gegnum hanska Adams og inn í markið.

Staðan var 2:1 eftir fyrsta leikhlutann og hún breyttist ekki lengi vel. SR komst í yfirtölu um miðjan annan leikhlutann og dundu þá skotin á marki heimamanna. Allt kom fyrir ekki og áfram var barist. Mark frá Jussi Sipponen kom SA í 3:1 og þá hrökk allt í baklás hjá Reykvíkingum. Heimamenn héldu þeim í heljargreiðum og eftir mikla orrahríð, þar sem Atli Snær Valdimarsson varði eins og berserkur, náði Andri Már Mikaelsson að skora fjórða markið. Í kjölfarið voru SR-ingar sendir í refsiboxið í bunkum og SA sótti áfram.

Staðan var 4:1 þegar lokaleikhlutinn hófst og Akureyringar með öll tromp á hendi. Í byrjun hans voru gestirnir nefnilegar tveimur færri og útlitið því svart hjá þeim. SR-ingar voru langt frá því að vera hættir og þeir stóðu af sér refsingarnar og héldu ótrauðir áfram. Þeim gekk ekkert að skora þótt þeir væru tvisvar í yfirtölu og smám saman þvarr þróttur SR-inga. Miloslav Racansky fékk þó víti fyrir SR þegar skammt var eftir en hann nýtti það ekki. Á lokamínútunum sótti SR loks af miklum móð en allt kom fyrir ekki. SA vann því 4:1. Titillinn er því Akureyringa í 20. skiptið.

4:1

Loka

Jordan Steger (16. mín.)

Thomas Stuart-Dant (16. mín.)

Jussi Sipponen (31. mín.)

Andri Már Mikaelsson (36. mín.)

Mörk

Aron Knútsson (18. mín.)

mín.

60		Leik lokið Akureyringar vinna leikinn og Íslandsmótinu í íshokkí er þar með lokið. Íslandsmeistaratitillinn fer á loft eftir skamma stund.
57		Felix Dahlstet (SR) Víti fer forgörðum Ætli leikurinn hafi ekki farið endanlega þarna. Milos kemst upp að markinu en Adam ver vítið.
57		Milos brunar upp völlinn en Orri verst vel. Hann fær þó dæmt á sig víti.
57		Jóhann Leifsson er straujaður og er studdur útaf vellinum. Það eru nú fjórar mínútur eftir og SA virðist ætla að landa titli í dag.
51		Heimamenn sleppa með skrekkinn og nú er aftur jafnt í liðum. Það eru tíu mínútur eftir.
50		Petr Kubos dælir skotum á mark SA. Pökkurinn fer ekki inn.
49		Jóhann Leifsson (SA) 2 mín. brottvísun Heimamenn eru að bjóða hættunni heim með því að koma sér í refsiboxið.
48		Tíminn tifar og SR þarf að skora sem fyrst.
44		Thomas Stuart-Dant (SA) 2 mín. brottvísun Gestirnir geta nú komið sér inn i leikinn.
43		Nú er jafnt í liðunum á ný. SA hefði nánast klárað leikinn með marki þegar þeir voru tveimur og einum manni fleiri.
42		SR-ingar halda út í mínútu tveimur mönnum færri. Þeir bruna svo upp völlinn og skora næstum. Það hefði verið frábær vítamínssprauta fyrir þá að fá mark
41		Þriðji leikhluti hafinn
40		Öðrum leikhluta lokið SA er sem stendur í algjörri kjörstöðu. Gestirnir í SR hafa 20 mínútur til að rétta sinn hlut og framlengja einvígið um titilinn.
40		Kári Guðlaugsson (SR) 2 mín. brottvísun þetta er slæmt fyrir SR. Dómararnir eru reglulega harðir.
39		Felix Dahlstet (SR) 2 mín. brottvísun Reykvíkingar eru ekki að gera sér auðvelt fyrir með brottrekstrum.
37		Jóhann Ragnarsson (SR) 2 mín. brottvísun Þetta virtist ekki mikið. Orri féll og Egill fær refsingu.
36		MARK! Andri Már Mikaelsson (SA) Mark 4:1. Andri Már er búinn að vaða í færum síðustu mínútur og nú tókst honum aðsenda pökkinn í netið.
35		Vá. Atli Snær er að bjarga SR-ingum trekk í trekk með góðri markvörslu.
32		Robbie Sigurðsson (SR) 2 mín. brottvísun Eitthvað er að hitna í mönnum og Robbie fer í refsiboxið fyrir að hafa ráðist á Orra Blöndal. Orri er eflaust ekki saklaus í þeim viðskiptum.
31		MARK! Jussi Sipponen (SA) Mark 3:1. Stórkostlegt spil hjá SA endar með að Jussi fær pökkinn framan við markið. Hann er ekkert að flýta sér og bíður lengi áður en hann sendir boltann upp í þaknetið. Pökkurinn virtist hafa hrokkið af markslánni en Andri Már fylgdi eftir og skoraði aftur.
29		Nú er búi að vera hlé á leiknum þar sem mark SR-inga gekk úr skorðum.
28		Heimamenn standa af sér orrahríðina og í kjölfarið á Jussi magnaðan sólókafla sem fær áhorfendur til að súpa hveljur. Jussi reynir svo töfrasendingu á Jordan en hún heppnast ekki. Jordan hefði verið í dauðafæri ef hann hefði fengið pökkinn.
26		SR í stórsókn og skotin dynja á marki SA.
26		Hafþór Sigrúnarson (SA) 2 mín. brottvísun Mikil læti í Hafþóri upp við rammann og hann er sendur í kælingu.
24		Heimamenn í SA hafa verið mjög ákafir í upphafi leikhlutamns. SR-ingar eiga í vök að verjast.
21		Annar leikhluti hafinn
20		Fyrsta leikhluta lokið Hnífjafn og spennandi leikur eins og við var búist.
18		MARK! Aron Knútsson (SR) Mark 2:1. Þrumuskot sem virðist stefna framhjá fer í hanska Adams og dettur inn. SR-ingar voru búnir að vinna fyrir þessu marki.
17		Tvö mörk á sömu mínútunni er áfall fyrir SR. Gestirnir sækja nú af krafti.
16		MARK! Thomas Stuart-Dant (SA) Mark 2:0. Thomas þrumar pökknum upp í samskeytin.
16		MARK! Jordan Steger (SA) Mark 1:0. Jordan leikur með pökkinn framan við mark SR og nær lúmsku bakhandarskoti. Pökkurinn virðist fara á milli fóta Atla í markinu.
15		SA nær nokkrum skotum í yfirtölunni.
14		Styrmir Friðriksson (SR) 2 mín. brottvísun Klafs og fella hjá Styrmi.
13		Nú sækja liðin á víxl. Leikurinn er að opnast og hraðinn eykst.
10		Robbie fær góða sendingu inn að markinu frá Agli en hann hittir ekki pökkinn. SR-ingar eru öllu líklegri sem stendur.
7		SR-ingar sýna þolinmæði og spila sig í gott færi. Adam ver skotið frá Agli Þormóðssyni.
6		Orri Blöndal (SA) 2 mín. brottvísun Mjög góð tækling frá Orra en hann er dæmdur brotlegur. Þarna var Milos að komast í gott færi.
5		SA tókst að leysa vandræði sín vel og SR náði engri pressu á mark þeirra.
3		Rúnar Rúnarsson (SA) 2 mín. brottvísun Fyrsti dómjur dagsins. það er Lurkurinn sem fær að setjast í refsiboxið.
1		SR-ingar eiga fyrsta skotið.
0		Atli Snær Valdimarsson byrjar í markinu hjá SR.
0		Leikur hafinn
0		Nokkrir stuðningsmenn SR eru komnir norður og ætla eflaust að láta vel í sér heyra.
0		Liðin eru nú kynnt til leiks. Mér segir svo hugur að bardaginn í dag verði blóðugur.
0		Fyrstu tveir leikirnir í þessu einvígi hafa verið mjög jafnir og spennandi. SA vann þá báða 3:2, fyrri leikinn í framlengingu.
0		Um þriðja leik einvígisins er að ræða og er SA búið að vinna fyrstu tvo og nægir sigur í dag til að verða Íslandsmeistari.
0		Góðan dag og verið velkomin með mbl.is í beina textalýsingu frá leik SA og SR í úrslitaeinvígi um Íslandsmeistaratitil karla í íshokkíi.