Hilmar og Guðbjörg best á árinu

Uppskeruhátíð Frjálsíþróttasambands Íslands fór fram í gærkvöldi þar sem veittar voru ýmsar viðurkenningar fyrir árið 2019 en þar ber helst að nefna valið á frjálsíþróttafólki ársins. Spretthlauparinn Guðbjörg Jóna Bjarnadóttir var valin frjálsíþróttakona ársins og sleggjukastarinn Hilmar Örn Jónsson frjálsíþróttakarl ársins.

Guðbjörg Jóna átti frábært ár þar sem hún bætti Íslandsmet kvenna í bæði 100 og 200 metra spretthlaupi og jafnaði Íslandsmet Tiönu Óskar Whitworth í 60 metra hlaupi. Hún var hluti af 4x200 metra boðhlaupssveitinni sem setti nýtt Íslandsmet á Reykjavík International Games. Einnig setti hún nokkur aldursflokkamet, bæði sem einstaklingur og í boðhlaupi. Guðbjörg keppti á EM U20 þar sem hún varð fjórða í 200 metra hlaupi og var hluti af íslenska Evrópubikarliðinu sem kom sér upp um deild í sumar. Á uppskeruhátíðinni fékk Guðbjörg einnig Jónsbikarinn fyrir besta spretthlaupsafrekið og var valinn stúlka ársins 19 ára og yngri.

Hilmar Örn bætti Íslandsmetið í sleggjukasti á árinu með því að kasta 75,26 metra. Hilmar keppir fyrir University of Virginia og varð ACC svæðismeistari fjórða árið í röð og sá fyrsti í sögunni til þess að ná þeim áfanga. Hann sigraði svo Austurdeildina og var þriðji á bandaríska háskólameistaramótinu. Hilmar var hluti af íslenska Evrópubikarliðinu sem kom sér upp um deild í sumar og svo er hann efstur Íslendinga á heimslistanum eða í 41. sæti í sinni grein. Á uppskeruhátíðinni var Hilmar einnig valinn kastari ársins í karlaflokki.

Hér má sjá heildarlista yfir viðurkenningar ársins 2019

• Hópur ársins: Landslið Íslands á Evrópubikar
• Nefnd ársins: Unglinganefnd
• Piltur ársins 19 ára og yngri: Kristján Viggó Sigfinnsson
• Stúlka ársins 19 ára og yngri: Guðbjörg Jóna Bjarnadóttir
• Hvatningarverðlaun unglingaþjálfara: Þjálfarar Ármanns 19 ára og yngri
• Öldungur ársins í karlaflokki: Ari Bragi Kárason
• Öldungur ársins í kvennaflokki: Árný Heiðarsdóttir
• Götuhlaupari ársins í karlaflokki: Hlynur Andrésson
• Götuhlaupari ársins í kvennaflokki: Elín Edda Sigurðardóttir
• Utanvegahlaupari ársins í karlaflokki: Þorbergur Ingi Jónsson
• Utanvegahlaupari ársins í kvennaflokki: Anna Berglind Pálmadóttir
• Langhlaupari ársins í karlaflokki: Hlynur Andrésson
• Langhlaupari ársins í kvennaflokki: Elín Edda Sigurðardóttir
• Stigahæsta afrek: Guðni Valur Guðnason
• Jónsbikar: Guðbjörg Jóna Bjarnadóttir
• Stökkvari ársins í kvennaflokki: Hafdís Sigurðardóttir
• Stökkvari ársins í karlaflokki: Ísak Óli Traustason
• Millivegalengdarhlaupari ársins í kvennaflokki: Aníta Hinriksdóttir
• Millivegalengdarhlaupi ársins í karlaflokki: Hlynur Andrésson
• Kastari ársins í kvennaflokki: Ásdís Hjálmsdóttir
• Kastari ársins í karlaflokki: Hilmar Örn Jónsson
• Fjölþrautakona ársins: María Rún Gunnlaugsdóttir
• Fjölþrautakarl ársins: Benjamín Jóhann Johnsen
• Frjálsíþróttakraftur: Arnar Pétursson
• Óvæntasta afrek ársins: Ásdís Hjálmsdóttir
• Frjálsíþróttakarl ársins: Hilmar Örn Jónsson
• Frjálsíþróttakona ársins: Guðbjörg Jóna Bjarnadóttir

Hilmar Örn Jónsson Ljósmynd/FRÍ

• Blogga um frétt