Grátlega nálægt stiginu

Ísland var grát­lega ná­lægt því að ná í stig gegn Englandi er landslið þjóðanna leiddu sam­an hesta sína á Laug­ar­dals­velli í Þjóðadeild karla í fót­bolta á laug­ar­dag. Skoraði Raheem Sterl­ing sig­ur­mark úr víti á loka­mín­út­unni. Wayne Roo­ney skoraði úr víti gegn Íslandi á EM í Frakklandi 2016, en Ísland jafnaði jafnóðum og skoraði sig­ur­mark skömmu síðar. Aft­ur svaraði Ísland um leið, fékk víti strax í næstu sókn, en Birk­ir Bjarna­son hitti ekki markið og þar við sat.

Án sjö lyk­ilmanna

Ísland var án sjö lyk­ilmanna í leikn­um og því eng­in skömm að tapa naum­lega fyr­ir gríðarlega sterku ensku liði, en að tapa leikn­um á þenn­an hátt var sér­stak­lega svekkj­andi. Leikpl­an Eriks Hamréns og Freys Al­ex­and­ers­son­ar var hárs­breidd frá því að ganga full­kom­lega upp. Íslenska liðið leyfði þeim ensku að vera með bolt­ann og stillti upp þéttri vörn sem Eng­lend­ing­ar áttu í erfiðleik­um með að brjóta niður. Átti að treysta á hraðar sókn­ir og föst leik­atriði, svo sem ekk­ert nýtt. Svipað upp­legg skilaði okk­ur inn á tvö stór­mót. Liðið sem komst á og spilaði á stór­mót­un­um tveim­ur var hins veg­ar mun sterk­ara vegna fjar­veru lyk­ilmanna á laug­ar­dag.

Það var vitað mál að ef Ísland ætlaði að spila blúss­andi sókn­ar­bolta gæti farið afar illa. Sterk­ara ís­lenskt lið tapaði t.a.m. 0:6 fyr­ir Sviss á úti­velli í sömu keppni fyr­ir tveim­ur árum. Ef litið er á töl­fræðina lít­ur hún ekki sér­stak­lega vel út. Ísland var 22 pró­sent með bolt­ann gegn 78, átti tvö skot gegn þrett­án, fékk eina horn­spyrnu gegn sjö og gaf 212 send­ing­ar á móti 770 hjá enska liðinu.

Miðað við aðstæður var hins veg­ar lítið annað í stöðunni en að fara þessa leið gegn liði sem er með betri leik­menn í hverri ein­ustu stöðu. Það verður að spila á styrk­leik­un­um og sér­stak­lega þegar sterk­ir póst­ar eru fjar­ver­andi.

Grein­ina má sjá í heild sinni á íþrótt­asíðum Morg­un­blaðsins í dag.