Sturla Snær komst áfram

Sturla Snær Snorrason lenti í fjórða sæti í undankeppni karla í svigi á heimsmeistaramótinu í alpagreinum í Cortina D’Ampezzo á Ítalíu í dag. Hann er þar með kominn áfram í aðalkeppnina í svigi, sem fer fram á morgun.

Sturla Snær átti afar góða fyrri ferð í undankeppninni og var í öðru sæti að henni lokinni. Í seinni ferðinni lenti hann í smvægilegum vandræðum þegar hann missti aðra legghlífina á miðri leið en það kom ekki að sök því hann endaði sem áður segir í fjórða sæti.

Þrír aðrir Íslendingar kepptu í undankeppninni í dag en komust ekki áfram. Gauti Guðmundsson endaði í 31. sæti og var því ekki langt frá því að komast áfram, en 25 efstu komust í aðalkeppnina. Gauti gerði mistök neðarlega í brautinni í fyrri ferðinni og var í 39. sæti eftir hana en seinni ferðin var góð og náði hann að vinna sig upp um átta sæti.

Bjarki Guðmundsson og Georg Fannar Þórðarson náðu ekki að ljúka fyrri ferð.

• Blogga um frétt