Íþróttir | mbl | 19.5.2021 | 9:17 | Uppfært 10:24

Afreksíþróttafólk fái sömu þjónustu

Lárus Blöndal, forseti ÍSÍ. mbl.is/Kristinn Magnússon

Íþrótta- og ólympíusamband Íslands (ÍSÍ) krefst þess að íþróttafólk sem tekur þátt í alþjóðlegum verkefnum fyrir Íslands hönd njóti sömu þjónustu frá yfirvöldum þegar kemur að bólusetningu við kórónuveirunni og keppendur á öðrum vettvangi.

Fram kemur í tilkynningu frá ÍSÍ að það hafi vakið undrun þegar fregnir bárust af því að íslenski Eurovision-hópurinn hafi fengið undanþágu fyrir bólusetningu.

Frétt af mbl.is

RÚV sótti um og fékk undanþágu fyrir hópinn

Óbólusett í stór og krefjandi verkefni

ÍSÍ segir að hingað til hafi stjórnvöld hafnað öllum óskum um að afreksíþróttafólk fái forgang í bólusetningu, að loknum bólusetningum viðkvæmra hópa og heilbrigðisstarfsfólks, svo það geti með öruggari hætti tekið þátt í alþjóðlegu mótahaldi.

„Því hefur afreksíþróttafólk landsins þurft að fara óbólusett í stór og krefjandi verkefni og í undankeppnir fyrir stórmót á efsta stigi viðkomandi íþróttar. Það hefur tekið áhættu á því að smitast af kórónuveirunni til að freista þess að viðhalda árangri landsins í íþróttum, árangri sem tekið hefur mörg ár að byggja upp,“ segir í tilkynningunni.

Frétt af mbl.is

Íþróttafólk ósátt við sóttvarnayfirvöld

„Að auki hefur íþróttafólkið og fylgdarlið þurft að dvelja langdvölum í sóttkví sem oftar en ekki raskar æfingaáætlunum og mögulega þátttöku í mótum auk kostnaðar sem af því hefur hlotist.“

Fá bóluefni fyrir Ólympíuleika

Fram kemur að Alþjóðaólympíunefndin (IOC) hafi útvegað bóluefni fyrir alla þátttakendur í Ólympíuleikum og Ólympíumóti fatlaðra (Paralympics) og mun ÍSÍ fá bóluefni fyrir þann hóp sem fer á leikana.

„Sú ráðstöfun kemur til með aðkomu IOC en ekki íslenskra yfirvalda og nær einungis til þessa þrönga hóps. Vonast er til að þessi bólusetning hefjist í næstu viku í góðu samstarfi við sóttvarnasvið embættis landlæknis,“ segir í tilkynningunni.