Valgerður keppir loks í kvöld

Valgerður Guðsteinsdóttir, fyrsta og eina atvinnuhnefaleikakona Íslands, keppir sinn sjöunda atvinnubardaga í boxi þegar hún mætir Claire Sammut frá Möltu á boxkvöldi í Jönköping í Svíþjóð í kvöld.

Valgerður átti upphaflega að mæta hinni þaulreyndu Diönu Starkovu frá Úkraínu í kvöld en hún heltist úr lestinni.

Þá átti Valgerður að mæta Sammut í vor á Möltu en hætta þurfti við þann bardaga þegar eyjunni var lokað vegna kórónuveirufaraldursins. Sammut gat hins vegar hlaupið í skarðið fyrir Starkovu í kvöld.

Frétt af mbl.is

Orðið löngu tímabært að berjast aftur

Valgerður hefur unnið fjóra bardaga og tapað tveimur á ferli sínum sem atvinnuhnefaleikakona. Hún hefur ekki keppt síðan í mars 2019 þegar hún sigraði hina úkraínsku Sabinu Mishchenko með tæknilegu rothöggi í 5. lotu.

Erfiðlega hefur gengið að fá bardaga síðan þar sem faraldurinn og ýmislegt annað hefur sett strik í reikninginn.

Ekkert ætti þó að geta komið í veg fyrir að hún berjist gegn Sammut, sem hefur unnið fjóra bardaga og tapað sjö sem atvinnuhnefaleikakona, á „Night of the Champions“ boxkvöldinu í Jönköping í kvöld. Um sex lotu bardaga verður að ræða.

Áætlað er að bardagi Valgerðar hefjist klukkan 17.50 að íslenskum tíma og er hægt að kaupa aðgang að streymi frá bardaganum hér.

• Blogga um frétt