Guðni og Erna fremst í flokki hjá FRÍ

Kastararnir Guðni Valur Guðnason og Erna Sóley Gunnarsdóttir úr ÍR urðu fyrir valinu sem frjálsíþróttakarl og frjálsíþróttakona ársins 2021 hjá Frjálsíþróttasambandi Íslands.

Mikill fjöldi viðurkenninga var afhentur á rafrænni uppskeruhátíð sambandsins þar sem Guðni Valur fékk þrenn verðlaun. Hann vann stigahæsta afrek ársins í karlaflokki og var auk þess útnefndur kastari ársins. Erna Sóley var útnefnd kastari ársins í kvennaflokki.

Guðni kastaði kringlu 65,39 metra á árinu en Íslandsmet hans í greininni er 69,35 metrar. Þá kastaði hann kúlu 18,81 metra innanhúss.

Erna Sóley kastaði 16,95 metra í kúluvarpi innanhúss og 16,77 metra utanhúss á árinu en hvort tveggja er Íslandsmet.

Guðbjörg Jóna Bjarnadóttir úr ÍR fékk Jónsbikarinn fyrir besta spretthlaupsafrek ársins en yfirlit yfir allar viðurkenningarnar auk skemmtilegs myndbands frá hátíðinni má sjá hér.

Erna Sóley Gunnarsdóttir setti Íslandsmet bæði innanúss og utanhúss. Ljósmynd/Guðmundur Karl Sigurdórsson

• Blogga um frétt