Setti mótsmet og stefnir á HM

Hilm­ar Örn Jóns­son úr FH setti í dag móts­met í sleggjukasti karla á Meist­ara­móti Íslands í frjálsíþrótt­um sem fer fram í Kaplakrika um helg­ina. 

Hilm­ar kastaði lengst 75,20 metra í öðru kasti sínu og fékk 1.120 af­reks­stig sem er frá­bær ár­ang­ur. Íslands­met Hilm­ars er 77,10 metr­ar sem hann náði í lok ág­úst 2020. 

„Ég var nokkuð ánægður með frammistöðuna í dag. Þetta var það sem ég ætlaði mér að gera og þetta hafðist. Þetta hafðist kannski aðeins of snemma í mót­inu þannig ég átti erfitt með að stilla mig inn eft­ir fyrstu tvær um­ferðirn­ar, en engu að síður mjög sátt­ur.

Það var svo­lítið mikið und­ir í dag. Það var sæti á HM und­ir þannig þegar það var nokk­urn veg­inn komið í ann­arri um­ferð þá var svo­lítið erfitt að peppa sig upp og ein­beita sér að næstu fjór­um köst­um.

Ég var að koma frá Svíþjóð þar sem ég var hjá þjálf­ar­an­um mín­um. Það gekk mjög vel að æfa þar sem skilaði sér í dag. 

Fram­haldið er svo HM um miðjan júlí. Ég reikna með að fara út til Banda­ríkj­anna í byrj­un júní til að æfa fyr­ir það,“ sagði Hilm­ar í sam­tali við mbl.is.

Ingvar Freyr Snorra­son úr ÍR var hinn kepp­andi sleggjukasts­ins og kastaði lengst 35,97 metra en Mím­ir Sig­urðsson úr FH hætti við þátt­töku.

Jada Birna Long Guðna­dótt­ir úr Breiðabliki var efst í stang­ar­stökki kvenna fyrr í dag. Hún stökk hæst 2,53 metra. El­iza­bet Rún Hall­gríms­dótt­ir úr Breiðabliki endaði í öðru sæti, hún stökk hæst 2,23 metra. 

• Blogga um frétt