Ólýsanleg tilfinning

„Mér líður mjög vel. Það eru marg­ar til­finn­ing­ar eins og gleði og spenna. Það var smá stress í byrj­un en það er allt farið,“ sagði Björn Helgi Devine, fyr­irliði drengja­landsliðs Íslands í hóp­fim­leik­um, í sam­tali við mbl.is.

Liðið keppti í undanúr­slit­um Evr­ópu­móts­ins í Lúx­em­borg í gær og mótið var það stærsta sem liðið hef­ur tekið þátt í til þessa.„Það var sturlað, ótrú­lega skemmti­legt og hrein­lega ólýs­an­leg til­finn­ing,“ sagði hann.

Bestu æf­ing­ar ís­lenska liðsins í gær voru á dýnu og var Björn ánægður með hvernig gekk þar. „Ég var mjög sátt­ur við hvernig við fram­kvæmd­um stökk­in þar og hvernig við lent­um,“ sagði hann. Ísland var í fimmta sæti af fimm liðum, en hin liðin eru tölu­vert eldri og reynslu­meiri. „Við þurf­um alltaf að vera já­kvæðir og bjart­sýn­ir. Þetta er allt reynsla og við lær­um af þessu.“

Ísland kepp­ir aft­ur á morg­un í úr­slit­um og fá strák­arn­ir þá annað tæki­færi til að skína. „Við ætl­um að njóta þess að vera hérna og gera okk­ar besta. Við ætl­um að leggja okk­ur alla fram og þá eig­um við að vera sátt­ir við sjálfa okk­ur,“ sagði Björn Helgi.

• Blogga um frétt