Myndir: Blikar fögnuðu titlinum með flugeldasýningu

Stuðnings­menn Breiðabliks fjöl­menntu á Kópa­vogs­völl í kvöld þegar liðið tók á móti KR í efri hluta Bestu deild­ar karla í knatt­spyrnu til þess að fagna fyrsta Íslands­meist­ara­titli karlaliðsins í tólf ár.

Breiðablik tryggði sér Íslands­meist­ara­titil­inn á mánu­dag­inn var þegar Stjarn­an lagði Vík­ing úr Reykja­vík að velli í Garðabæn­um en eft­ir leik­inn var ljóst að ekk­ert lið gæti náð Breiðablik að stig­um í síðustu þrem­ur um­ferðunum.

Það var því mikið um dýrðir á Kópa­vogs­velli í kvöld þar sem stuðnings­menn liðsins fjöl­menntu og var meðal ann­ars blásið til flug­elda­sýn­ing­ar fyr­ir leik.

Þá stóðu leik­menn KR heiðursvörð fyr­ir Blika þegar liðið gekk út á völl­inn en KR-ing­ar gerðu sér lítið fyr­ir og lögðu Blika að velli í kvöld með einu marki gegn engu.

Þetta var fyrsta tap Breiðabliks á heima­velli í deild­inni síðan 2. maí árið 2021 þegar liðið tapaði ein­mitt fyr­ir KR og þá var þetta fyrsti heima­leik­ur liðsins í sum­ar þar sem liðinu mistekst að skora mark.

Þrátt fyr­ir tapið var góð stemn­ing á Kópa­vogs­velli enda í annað sinn í sögu fé­lags­ins sem karlalið fé­lags­ins verður Íslands­meist­ari.

Ljós­mynd­ar­inn Krist­inn Steinn Trausta­son var á Kópa­vogs­velli í kvöld og fangaði stemn­ing­una hjá leik­mönn­um og stuðnings­mönn­um Blika.