Tobias sigraði á alþjóðlegu stigamóti

Íslenski skíðakappinn Tobias Hansen gerði sér lítið fyrir og sigraði á alþjóðlegu stigamóti í stórsvigi í Voss í Noregi um síðustu helgi.

Tobias, sem er 19 ára gamall, fór fyrri ferð á 1:19,28 mínútum og síðari ferð sína á 1:18,08, besta tíma mótsins.

Samanlagður tími hans var 2:37,36 sem nægði til þess að tryggja Tobiasi frækinn sigur.

Norðmaðurinn Elias Vik hafnaði í öðru sæti á tímanum 2:39,24, tæplega tveimur sekúndum á eftir Tobiasi.

Með sigrinum á mótinu féllu 42,73 FIS stig honum í skaut.

Skíðasamband Íslands greinir frá því að Tobias muni taka þátt í nokkrum mótum til viðbótar á næstunni, mestmegnis í Svíþjóð og Noregi.

• Blogga um frétt