Íþróttir | mbl | 15.4.2023 | 15:13

Svissneskur og norskur sigur í Fossavatnsgöngunni

Elisabeth Schicho, Nadja Kaelin og Andrea Kolbeinsdóttir á verðlaunapalli í dag. Ljósmynd/Aðsend

Fossavatnsgangan, stærsta skíðagöngumót landsins, fór fram á Ísafirði í dag. Það voru þau Nadja Kaelin frá Sviss og Mathias Aas Rolid frá Noregi sem komu fyrst í mark í kvenna- og karlaflokki í 50 kílómetra göngunni.

Efstu Íslendingarnir í göngunni voru þau Andrea Kolbeinsdóttir og Snorri Eyþór Einarsson.

„Keppnin gekk einstaklega vel í ár, í rauninni betur en við þorðum að vona, enda hefur snjóleysi aðeins verið að hrjá okkur.

Mér hefur sýnst svo til hver einasti þátttakandi koma brosandi í mark, enda lék veðrið við okkur, nánast logn, dálítil þoka í efstu hlutum brautarinnar en engin úrkoma,“ sagði Kristbjörn Róbert Sigurjónsson, starfsmaður göngunnar, í tilkynningu.

Alls voru 300 keppendur mættir á ráslínuna fyrir 50 kílómetra gönguna klukkan átta í morgun en þar að auki voru 92 keppendur í 25 kílómetra göngunni og 37 í 12,5 kílómetra göngunni.

Vegna leysinga undanfarnar vikur þurftu skipuleggjendur göngunnar og starfsfólk skíðasvæðisins á Ísafirði að vera lausnamiðaðir í lagningu brautanna, og raunar voru brautirnar allar styttri en venjulega; 50 km brautin var um 46 km, 25 km brautin var um 24 km og 12,5 km brautin var um 9 km.

Þrátt fyrir skort á nýjum snjó voru aðstæður í brautunum nokkuð góðar, með hröðu rennsli í efstu brekkunum.

Úrslit:

50 km

Kvennaflokkur