Íþróttir | mbl | 22.4.2023 | 21:45

Árni og Helena tvöfaldir Íslandsmeistarar í Judo

Árni Pétur Lund með tilþrif á mótinu í dag. Ljósmynd/Judosamband Íslands

Íslandsmótið í Judo fór fram í Laugardalshöll í dag. Árni Pétur Lund og Helena Bjarnadóttir urðu tvöfaldir Íslandsmeistarar, en þau sigruðu opinn flokk karla og kvenna auk síns þyngdarflokks, -90kg hjá Árna og -70kg hjá Helenu.

Alexander Eiríksson úr JG sigraði -60kg karla. Þetta var fyrsti Íslandsmeistaratitill Alexanders í karla flokki og jafnframt fyrsti Íslandsmeistaratitill Judofélags Garðabæjar.

Ingólfur Rögnvaldsson varð Íslandsmeistari í -66kg. Var þetta þriðji Íslandsmeistaratitill Ingólfs í röð í -66kg flokknum.

Aðalsteinn Björnsson og Kjartan Hreiðarsson, báðir úr JR mættust í úrslitum -73kg flokksins. Aðalsteinn sigraði í gullskori eftir jafna viðureign og tryggði sér þar með sinn fyrsta Íslandsmeistaratitil í fullorðinsflokki.

Aðrir sigurvegarar:

Breki Bernharðsson (UMFS) varð Íslandsmeistari í -81kg flokki karla.

Egill Blöndal (UMFS) varð Íslandsmeistari í -100kg flokki karla.

Karl Stefánsson (JDÁ) varð Íslansmeistari í +100kg flokki karla.