Íþróttir | mbl | 20.5.2023 | 12:25 | Uppfært 12:50

Conor McGregor snýr aftur í UFC

Conor McGregor hefur ekki keppt í UFC síðan hann fótbrotnaði í tapi gegn Dustin Poirier sumarið 2021. AFP

Írski bardagakappinn Conor McGregor hyggst snúa aftur til keppni í UFC í blönduðum bardagalistum á árinu.

Í UFC eru strangar reglur um lyfjanotkun þar sem allt bardagafólk þarf að vera meðlimir í USADA, lyfjaeftirliti Bandaríkjanna, til þess að geta tekið þátt í bardögum.

McGregor sagði sig úr USADA eftir að hafa lotið í lægra haldi gegn Dustin Poirier árið 2021, þar sem Írinn fótbrotnaði.

Í yfirlýsingu frá USADA, sem MMA Junkie birti, segir að samtökin búist við því að McGregor gangi aftur í þau sem fyrst.

Í samtali við Matchroom Boxing í gær sagði McGregor að hann hygðist snúa aftur í búrið fyrir árslok og bindi vonir við að mæta Michael Chandler í desember.

Dana White, forstöðumaður UFC, staðfesti í viðtali við Pat McAfee að McGregor myndi snúa aftur í búrið.