Gabríela náði lengst í Kaupmannahöfn

Gabríela Einarsdóttir náði bestum árangri Íslendinga á Norðurlandamótinu í línuklifri sem fram fór í Kaupmannahöfn um helgina.

Gabríela, sem er nýkrýndur Íslandsmeistari í greininni, hafnaði í sjötta sæti með 22+ stig sem er besti árangur íslenskrar konu á Norðurlandamóti fullorðinna frá upphafi. Ingrid Kindilhagen varð Norðurlandameistari með yfirburðum og fékk 33+ stig.

Guðmundur Freyr Arnarsson náði bestum árangri í karlaflokki þar sem hann endaði í sjöunda sæti með 20+ stig en Birgir Óli Snorrason og Stefán Þór Sigurðsson höfnuðu í níunda og tíunda sæti. Norðurlandameistari varð Fredrik Serlachius frá Svíþjóð með 34+ stig.

Jenný Þóra Halldórsdóttir náði sjöunda sæti í flokki ungmenna U16-ára en alls komust  sjö íslenskir keppendur í tíu manna úrslit í sínum flokkum á mótinu.

• Blogga um frétt