Íþróttir | mbl | 1.12.2023 | 6:00 | Uppfært 11:36

„Ég var frekar sár og bitur“

„Ég viðurkenni það alveg að ég var frekar sár og bitur,“ sagði sundkonan fyrrverandi og Ólympíufarinn Hrafnhildur Lúthersdóttir í Dagmálum.

Hrafnhildur, sem er 32 ára gömul, lagði sundhettuna mjög óvænt á hilluna í ársbyrjun 2018, þá 27 ára gömul, en ein af ástæðum þess að hún ákvað að hætta var skortur á fjármagni og lítill stuðningur stjórnvalda við íslenskt afreksíþróttafólk.

Íþróttafólk þarf miklu meiri stuðning

Synti til úrslita á Ólympíuleikum

Hrafnhildur hafnaði í öðru sæti í kjörinu á íþróttamanni ársins árið 2016 en hún hafði þá synt til úrslita á Ólympíuleikunum í Ríó þar sem hún hafnaði í 6. sæti í 100 metra bringusundi.

Frétt af mbl.is

Gylfi íþróttamaður ársins 2016

Þá vann hún til silfurverðlauna í 100- og 50 metra bringusundi á Evrópumeistaramótinu í Lundúnum, ásamt því að vinna til bronsverðlauna í 200 metra bringusundi á sama móti en Gylfi Þór Sigurðsson, sem þá lék með Swansea í ensku úrvalsdeildinni, hreppti nafnbótina íþróttamaður ársins það árið.

Frétt af mbl.is

Minnsti munur á tveimur efstu í fimm ár

Hefði hjálpað mér mjög mikið

„Ég hugsaði alveg með mér hvað ég þyrfti eiginlega að gera, ef ég myndi ekki fá verðlaunin eftir það sem ég afrekaði á árinu 2016,“ sagði Hrafnhildur.

„Ég þarf þá að vinna gull á Ólympíuleikunum ef ég ætla mér að vinna þessa verðlaun hugsaði ég með mér og þetta sat alveg í mér.

Það var samt alveg flottur árangur að hafna tvívegis í öðru sæti í kjörinu en þú færð enga styrki hjá fyrirtækum fyrir að hafna í öðru sæti þannig að það hefði hjálpað mér mjög mikið að hljóta nafnbótina á sínum tíma,“ sagði Hrafnhildur meðal annars.

Viðtalið við Hrafnhildi í heild sinni má nálgast með því að smella hér eða á hlekkinn hér fyrir ofan.