Íslenskur Norðurlandameistari í Eistlandi

Tíu íslenskir sundmenn voru á meðal keppenda í úrslitahlutanum á Norðurlandameistaramótinu í Tartu í Eistlandi í dag.

Guðmundur Leo Rafnsson gerði sér lítið fyrir og varð Norðurlandameistari í unglingaflokki í 200m baksundi þegar hann synti á tímanum 1:57,33 og bætti tíma sinn um tæpa sekúndu.

Katja Lilja Andriysdóttir tryggði sér brons í unglingaflokki í 400m skriðsundi þegar hún bætti tíma sinn um tæpar tvær sekúndur, en hún synti 4:19,80

Önnur úrslit voru:

Bergur Fáfnir Bjarnason synti 200m baksund á tímanum 2:03,83 og varð í sjöunda sæti.

Freyja Birkisdóttir synti 400m skriðsund á 4:25,62 og varð í sjöunda sæti.

Veigar Hrafn Sigþórsson synti einnig 400m skriðsund og varð í 8. sæti í fullorðinsflokki þegar hann synti í 3:59,94.

Sunna Arfinnsdóttir synti 200m flugsund á tímanum 2:26,88 og varð í sjötta sæti.

Fannar Snævar Hauksson synti 100m flugsund varð sjötti á tímanum 54,62.

Eva Margrét Falsdóttir synti 200m bringusund á tímanum 2:31,24 sem er bæting hjá henni, hún varð í fimmta sæti.

Vala Dis Cicero synti 50m skriðsund á tímanum 26,22 sekúndum og varð í áttunda sæti.

Simon Elías synti einnig 50m skriðsund á tímanum 22,91 sekúndum og varð í fimmta sæti.

Stúlkurnar syntu í lok dags 4x 200m skriðsund, þær urðu í fjórða sæti á tímanum 8:22,31. Sveitina skipuðu þær : Vala Dís, Katja Lilja, Freyja Birkis og Nadja Djurovic

Strákarnir syntu einnig 4x200m skriðsund á tímanum 7:32,71 og urðu í fimmta sæti. Sveitina skipuðu þeir Ýmir Chatneay, Guðmundur Leo, Magnús Víðir og Bergur Fáfnir.

• Blogga um frétt