Fyrsti dagur hins sögufræga Wimbledon móts í tennis er í dag. Fyrsta mótið var haldið árið 1877 þar sem keppt var í einliðaleik karla en Wimbledon er eina stórmótið sem haldið er á grasvöllum.
Ríkjandi meistari, Carlos Alcaraz hefur leik klukkan 12:30 að íslenskum tíma þegar hann mætir Eistanum Mark Lajal en Spánverjinn er þriðji maður á heimslistanum og í feykna formi eftir sigurinn á Opna franska mótinu.
Efstu menn á lista eru Ítalinn ungi, Jannik Sinner, í fyrsta sæti en hann er tuttugu og tveggja ára gamall og vann Opna ástralska mótið í byrjun árs. Goðsögnin Novak Djokovic er annar á lista og segist vera klár í slaginn þrátt fyrir smávægilega hnéaðgerð í byrjun júnímánðar.
Kvennamegin eru leirdrottningin Iga Swiatek, bandaríska TikTok stjarnan Coco Gauff og Hvít-Rússinn Aryna Sabalenka í efstu sætunum á styrkleikalistanum en ríkjandi meistarinn Markéta Vondrousova er sjötta á listanum.