Tenniskappinn Jannik Sinner, sem féll tvisvar á lyfjaprófi í mars, hefur rekið þjálfara sinn Umberto Ferrara sem og sjúkraþjálfara sinn Giacomo Naldi.
Sinner, sem er í efsta sæti heimslistans, greindist með lítið magn umbrotsefnis af clostebol, tegund stera sem ýtir undir uppbyggingu vöðvamassa, á meðan hann keppti á Indian Wells-mótinu í Kaliforníuríki í Bandaríkjunum.
Ítalinn slapp við bann þar sem alþjóðlega siðanefndin í tennis komst að þeirri niðurstöðu að efnið hafi óvart borist í blóðrás Sinners eftir meðhöndlun hjá sjúkraþjálfaranum.
Naldo hafði borið á sig sprey sem hægt er að fá án lyfseðils á Ítalíu vegna sárs á hendi. Sjúkraþjálfarinn hafi svo meðhöndlað Sinner með þeim afleiðingum að efnið barst óviljandi í blóðrás hans.
Spreyið fékk Naldo frá Ferrara og hefur Sinner nú rekið þá báða.
„Ég vil þakka þeim fyrir að hafa jákvæð áhrif á ferilinn minn en því miður get ég ekki treyst þeim lengur,“ sagði hann við BBC.