Gamla ljósmyndin: Vann hug og hjörtu landsmanna
Setja bókamerki
Íþróttadeild Morgunblaðsins og mbl.is heldur áfram að gramsa í myndasafni Morgunblaðsins og birta á mbl.is á laugardögum.
Þessi dagskrárliður snýr nú aftur eftir sumarfrí, við ómælda gleði lesenda ef af líkum lætur.
Nú þegar Paralympics leikarnir eru í gangi í París er skemmtilegt að rifja upp afrek Jóns Margeirs Sverrissonar á Paralympics í London 2012. Tíminn líður hratt eins og Magnús Eiríksson minnti á hér um árið og liðin eru tólf ár frá því Jón Margeir vann hug og hjörtu landsmanna með glæsilegu afreki og hispurslausri framkomu.
Jón Margeir vann til gullverðlauna í 200 metra skriðsundi, eða sundi með frjálsri aðferð eins og það er strangt til tekið kallað, í flokki S14. Jóni tókst það sem alla dreymir um og það er að hámarka árangur sinn á stórmóti því hann setti um leið heimsmet. Jón synti vegalengdina í ólympíulauginni glæsilegu í London á 1:59,62 mínútum.
Jón Margeir er síðasti Íslendingurinn til að vinna til gullverðlauna á Paralympics og var ekki orðinn tvítugur þegar hann stóð á efsta palli. Daniel Fox frá Ástralíu varð annar á 1:59,79 og Cho Wonsang frá Suður-Kóreu þriðji á 1:59,93 mínútum.
Á meðfylgjandi mynd fagnar Jón sigri með gullið um hálsinn en myndina tók Eva Björk Ægisdóttir sem myndaði fyrir Íþróttasamband fatlaðra og mbl.is á leikunum.
Jón Margeir átti eftir að sýna að árangurinn í London var ekki tilviljun. Hann varð Evrópumeistari í greininni tveimur árum síðar í Hollandi og fékk tvívegis silfurverðlaun á HM. Fyrst í Kanada 2013 og aftur í Skotlandi 2015.
Jón Margeir keppti fyrir Fjölni/Ösp og var valinn Íþróttamaður Reykjavíkur árið 2012. Hann hafnaði jafnframt í 3. sæti í kjörinu á íþróttamanni ársins hjá Samtökum íþróttafréttamanna sama ár.
Eldgosinu er lokið
Riftunin lögmæt – Stórfelldar vanefndir
Stórbættur árangur barna
Stimplum stráka ólæsa og uppnefnum þá í sömu andrá
Úrlausnir á næstu dögum
Ekki hægt að fullyrða um óöryggi
Segja skólaeinkunnir barnanna ónothæfar
„Fyrst til skoðunar þegar bærinn verður orðinn öruggur“