Íþróttabandalag Hafnarfjarðar samþykkti á síðasta fundi sínum inngöngu Skautafélags Hafnarfjarðar í bandalagið.
Hefur skautafélagið því fengið formlega inngöngu í íþróttahreyfinguna, þar sem það er orðið aðildarfélag íshokkísambands Íslands.
Þá hefur félagið fengið inngöngu í Íslandsmót karla, þrátt fyrir að búið sé að spila tvo leiki í deildinni. Ekki er kvennalið innan félagsins að svo stöddu.
Fyrsti leikur Skautafélags Hafnarfjarðar verður á útivelli gegn Fjölni 4. október.
Engin skautahöll er í Hafnarfirði og verða heimaleikirnir því spilaðir á heimavelli andstæðinga liðsins.