Nýjung í tennis fer í taugarnar á nokkrum stærstu nöfnum íþróttarinnar en stórri klukku hefur verið komið fyrir á völlunum. Tilgangurinn er að flýta leiknum en tennisleikir geta tekið afar langan tíma.
Leikmenn hafa nú eina mínútu frá því þeir stíga inn á völlinn til að koma sér á réttan stað áður en peningi er kastað um hvor byrjar á að gefa upp. Klukkan er stöðvuð á meðan leikurinn er í gangi en fer í gang eftir hvert einasta stig og hafa leikmenn þrjátíu sekúndur til að hefja uppgjöf.
Andy Murray er hæstánægður með klukkuna en leikmenn fá aðvörun renni tíminn út áður en þeir gefa upp. Í annað skiptið missa þeir uppgjöf. Murray segir að leikur hans gegn Mackenzie McDonald hefði farið yfir þrjá klukkutíma ef ekki hefði verið fyrir klukkuna en leikur þeirra í fyrstu umferð tók tvo klukkutíma og 37 mínútur.
Carlos Alcaraz er ekki á sama máli.
„Þetta er ekki tennis. Ég er alltaf fljótur að gefa upp en ég fékk tvær aðvaranir í einu setti. Það er ekki hægt að spila tennis svona,“ heyrðist í Spánverjanum í leik hans á Beijing Open á dögunum.