Starfshópur skipaður um uppbyggingu þjóðarleikvangs

Ásmundur Einar Daðason mennta- og barnamálaráðherra hefur skipað starfshóp um uppbyggingu þjóðarleikvangs í frjálsíþróttum í Laugardal.

Starfshópurinn er skipaður samanber viljayfirlýsingu sem undirrituð var 2. september síðastliðinn um framtíðaruppbyggingu þjóðarleikvanga fyrir frjálsíþróttir og knattspyrnu.

Sú viljayfirlýsing var undirrituð af forsætisráðherra, mennta-og barnamálaráðherra, fjármálaráðherra, Reykjavíkurborg, Frjálsíþróttasambandi Íslands og Knattspyrnusambandi Íslands.

Í tilkynningu frá Frjálsíþróttasambandi Íslands segir að verkefni starfshópsins séu meðal annars að:

• Yfirfara fyrirliggjandi gögn sem tengjast uppbyggingu þjóðarleikvangs í frjálsíþróttum.
• Afla frekari gagna sem varða grundvöll uppbyggingarinnar.
• Vinna að útfærslu hugmynda sem fram koma í skýrslu starfshóps um þjóðarleikvang í frjálsíþróttum frá árinu 2021.
• Staðfesta staðarval fyrir nýjan þjóðarleikvang í frjálsíþróttum.
• Stilla upp tímasettri áætlun vegna framkvæmda við uppbyggingu mannvirkisins.
• Vinna að greiningu á kostnaði við uppbyggingu og rekstur mannvirkis.
• Leggja fram drög að samkomulagi um eignarhald og skiptingu kostnaðar við uppbyggingu og rekstur mannvirkisins.
• Skoða sérstaklega hvernig aðgengi frjálsíþróttafólks að mannvirkjum er tryggt á uppbyggingartíma.

Starfshópinn skipa eftirfarandi:

Gunnar Svavarsson, formaður
Freyr Ólafsson
Þórey Edda Elísdóttir
Ámundi V. Brynjólfsson
Helga Friðriksdóttir
Oddný Kristinsdóttir (varamaður)
Sigurður Haraldsson (varamaður)
Guðni Guðmundsson (varamaður)
Þórhildur Lilja Ólafsdóttir (varamaður)

Mikið gleðiefni fyrir frjálsíþróttahreyfinguna

„Skipun starfshópsins er mikið gleðiefni fyrir frjálsíþróttahreyfinguna. Stærra og meira en margir gætu haldið. Þetta er nefnilega framkvæmdarnefnd um uppbyggingu! Frjálsíþróttaaðstaðan er nú þegar farin af Laugardalsvelli og því mikilvægt að uppbyggingu ljúki sem fyrst.

Erum sannarlega þakklát miklum áhuga bæði ríkis og borgar að láta þá drauma rætast. Þjóðarleikvangurinn verður mikilvægur þáttur í öllu afreksstarfi í frjálsíþróttum, uppbyggingu Afreksmiðstöðvar Íslands, en verður einnig mikilvæg lyftistöng fyrir frjálsíþróttir barna- og unglinga í Laugardal og nágrenni.

Við höfum fundið fyrir sterkri þverpólitískri samstöðu í eflingu og uppbyggingu í afreksmálum og táknrænt að þessi nefnd skuli hefja störf einmitt nú við stjórnarskipti“, segir Freyr Ólafsson formaður Frjálsíþróttasambands Íslands í tilkynningu sambandsins.

• Blogga um frétt