Gamla ljósmyndin: Dreif í því að setja Íslandsmet
Setja bókamerki
/frimg/1/53/79/1537941.jpg)
Íþróttadeild Morgunblaðsins og mbl.is heldur áfram að gramsa í myndasafni Morgunblaðsins og birta á mbl.is á laugardögum.
/frimg/1/27/29/1272923.jpg)
Guðmundur Karlsson, framkvæmdastjóri Frjálsíþróttasambands Íslands og íþróttafræðingur, á athyglisverðan feril að baki í íslensku íþróttalífi sem keppandi og þjálfari.
Guðmundur setti Íslandsmet í sleggjukasti hinn 24. júlí árið 1994 á Meistaramóti Íslands í frjálsum sem fram fór á Laugardalsvelli. Bætti þá eigið met og gerði það raunar tvívegis í keppninni. Setti met bæði í öðru og þriðja kasti og flaug sleggjan lengst 66,28 metra.
Íslandsmetið stóð í 13 ár eða þangað til Bergur Ingi Pétursson sló það árið 2007 en báðir kepptu þeir fyrir FH. Guðmundur hafði fyrst eignast metið árið 1989.
Guðmundur var ekki við eina fjölina felldur í afreksíþróttunum og þegar hann setti metið var hann einnig þjálfari karlaliðs FH í handknattleik. Stefán Eiríksson, núverandi útvarpsstjóri, ræddi við Guðmund fyrir Morgunblaðið að MÍ loknu og þar kemur fram að Guðmundur hafði lofað því að setja nýtt met á keppnistímabilinu.
„Ég sá fram á að ég þyrfti að bæta metið í dag því við erum að byrja í handboltanum og því hef ég engan tíma í ágúst,“ er haft eftir Guðmundur í Morgunblaðinu 26. júlí 1994.
Meðfylgjandi mynd af Guðmundi er ekki tekin í Laugardalnum heldur í Mosfellsbænum. Þar er Guðmundur í hringnum að keyra upp hraðann en myndina tók Einar Falur Ingólfsson sem oft hefur komið við sögu í Gömlu ljósmyndinni.
Guðmundur var landsliðsþjálfari í frjálsum frá 1988-1990 og aftur 2002-2004. Hann hefur þjálfað landslið í tveimur greinum því hann hefur þjálfað yngri landslið í handknattleik.
Þjálfaraferill Guðmundur í handknattleiknum reis ef til vill hæst þegar hann gerði Hauka að Íslandsmeisturum árið 2000 og þótti nokkuð óvænt. Karlalið félagsins hafði þá ekki orðið Íslandsmeistari í íþróttinni í 57 ár. Var þá hátt sungið Heims um ból, eins og máltækið segir, í íþróttahúsinu við Strandgötu.
Fyrir þá sem hafa gaman að ættfræði í íþróttalífinu þá lék dóttir Guðmundur 67 A-landsleiki í handknattleik: Ragnhildur Rósa Guðmundsdóttir.
„Þetta mun allt enda með ósköpum“
Úkraínumenn handtóku norðurkóreskan hermann
Rúta með yfir 20 farþegum fór út af vegi
„Guð forði okkur frá því“ að Ísland missi tengslin
Hætta stafar af eldri feðrum, ekki mæðrum
Heitar sturtur skaðlegar: Mælt með moðvolgu vatni
Vélarbilun hjá Play setur áramótin í uppnám
