„Undirbúningurinn er ekki búinn að vera bestur“

„Það gekk bara frá­bær­lega í dag og von­um fram­ar á nokkr­um stöðum,“ sagði Þor­geir Ívars­son þjálf­ari kvennaliðs Gerplu í áhaldafim­leik­um sem tryggði sér bikar­meist­ara­titil­inn í dag.

„Við átt­um í smá erfiðleik­um með slána en svo náðum við að klára hana vel og skila þess­um frá­bæra sigri,“ sagði Þor­geir í viðtali við mbl.is eft­ir mótið.

„Und­ir­bún­ing­ur­inn er ekki bú­inn að vera best­ur. Við höf­um verið að glíma við meiðsli og þjálf­ara­breyt­ing­ar og alls kon­ar svo­leiðis, en við kom­um og sýnd­um það að liðsheild ger­ir svo ógeðslega margt og kom okk­ur yfir enda­mörk­in. 

Liðsheild­in var það sem mér per­sónu­lega fannst ganga best. Ef ein­hver átti ekki besta áhaldið eða mó­mentið þá kom næsti og reif upp liðið í heild sinni. Það var ekk­ert áhald sem gekk áber­andi best.“

Gerpla vann með 144,400 í ein­kunn sam­an­lagt sem er 9,650 meira en Stjarn­an sem lenti í öðru sæti.

„Þetta er fyrsta mót vors­ins og það er smá stress­andi að vita hvar hinir standa en við erum mest að hugsa um hvað við erum að gera, minna að pæla í því hvað hinir eru að gera.“

Það er nóg um að vera hjá Þor­geiri og nokkr­um meðlim­um kvennaliðs Gerplu í ár en það eru tvö stór­mót fram und­an. Þor­geir er einnig að þjálfa landsliðið og nokkr­ir iðkend­ur Gerplu eru í úr­vals­hópn­um 2025.

„EM er í maí og svo er HM í októ­ber í Indó­nes­íu. Þetta mót er fyrsta skrefið í und­ir­bún­ingn­um fyr­ir EM sem er und­ir­bún­ing­ur fyr­ir HM. Þetta set­ur lín­una og við reyn­um vana­lega að hafa þetta sem lág­marks­lín­una og svo stíg­um við upp héðan. Miðað við þetta mót þá eig­um við góðar lík­ur á frá­bær­um ár­angri á Evr­ópu­móti ef maður horf­ir yfir hvernig öll­um gekk í dag.“

• Blogga um frétt