Hungrið er meira í ár

Jó­hann Már Leifs­son, leikmaður Skauta­fé­lags Ak­ur­eyr­ar, var eðiliega sátt­ur eft­ir sig­ur á erkifjend­un­um í Skauta­fé­lagi Reykja­vík­ur í Laug­ar­daln­um í kvöld, 3:1, í öðrum leik úr­slita­ein­víg­is Íslands­móts karla í ís­hokkí.

SA leiðir ein­vígið 2:0 og get­ur tryggt sér Íslands­meist­ara­titil­inn á Ak­ur­eyri í þriðja leik liðanna á fimmtu­dag­inn.

Frétt af mbl.is

Norðan­menn ein­um sigri frá titl­in­um

„Þetta er bara geggjað. Sig­ur er alltaf sig­ur og þetta er bara fínt. Þetta var hörku­leik­ur, allt öðru­vísi leik­ur en fyr­ir norðan á laug­ar­dag­inn. Bæði lið voru miklu grimm­ari og það var mik­il harka í þessu, mjög skemmti­legt.“

Eins og Jó­hann seg­ir var mik­il harka í leikn­um og menn mikið að fá brott­vís­an­ir. Það fór ekki á milli mála að mikið var und­ir.

„Við viss­um að við mynd­um þurfa að hafa virki­lega mikið fyr­ir þessu (e. grind). Við viss­um líka að þeir myndu koma allt öðru­vísi stemmd­ir í þenn­an leik en fyr­ir norðan. Við héld­um sama leikplani.“

SA er eins og áður kom fram ein­um sigri frá Íslands­meist­ara­titl­in­um. Eft­ir ótrú­lega sig­ur­göngu SA hef­ur SR unnið titil­inn síðustu tvö ár.

„Planið á fimmtu­dag­inn er bara að halda áfram sama plani. Leikplanið er ekk­ert að fara að breyt­ast hjá okk­ur þó tit­ill­inn sé í húfi.

Ég myndi al­veg segja að hungrið sé meira í ár eft­ir að hafa tapað tvö ár í röð. Það er alltaf svekkj­andi að tapa þessu og ég held að hungrið sé aðeins meira núna.“

Lið SA er ör­lítið breytt frá und­an­förn­um árum en reynslu­mikl­ir menn eins og Andri Már Mika­els­son og Hafþór Andri Sigrún­ar­son hafa verið með Jó­hanni í fyrstu línu liðsins til margra ára. Sam­vinna þríeyk­is­ins hef­ur verið hreint út sagt ótrú­leg en nú eru yngri leik­menn komn­ir í fyrstu línu með Jó­hanni á meðan Andri og Hafþór taka að sér breytt hlut­verk.

„Það er kannski erfitt fyr­ir mig að svara þessu, ég er bú­inn að vera með Andra og Haffa í línu síðustu 10 ár held ég. Ungu gæj­arn­ir eru bara að stíga upp núna sem er bara frá­bært fyr­ir liðið og þeir eru að sýna það í leikj­un­um hérna með fram­lagi. 

Hlut­verk Andra og Haffa er ekk­ert minna, þeir fá al­veg jafn marg­ar mín­út­ur á ísn­um. Það er kannski bara aðeins öðru­vísi.“

Atli Sveins­son, leikmaður SA, meidd­ist í leikn­um, að því er virt­ist al­var­lega og var bor­inn út af svell­inu á bör­um. Jó­hann sagði leik­menn lítið hafa frétt af Atla þegar blaðamaður ræddi við hann skömmu eft­ir leik.

„Ég hef í raun ekk­ert heyrt en mér heyrðist lækn­ir­inn okk­ar vera að tala um að þetta hefði verið ökkl­inn. Ég veit samt ekki neitt og held að hann hafi verið bara að fara upp á sjúkra­hús í mynda­töku.“

Jó­hann Már Leifs­son, leikmaður SA. Ljós­mynd/​Krist­ín Hall­gríms­dótt­ir

• Blogga um frétt