Kylfingurinn Birgir Leifur Hafþórsson náði ekki að sýna sitt besta á lokahring Aegean Airlines-mótsins sem er hluti af Áskorendamótaröðinni í Evrópu, en leikið var í Þýskalandi.
Birgir Leifur lék á 75 höggum, eða fjórum höggum yfir pari, í dag og endaði í 55. sæti af þeim 62 sem komust í gegnum niðurskurðinn.
Birgir Leifur byrjaði á fjórum pörum í röð en á fimmtu holu fékk hann þrefaldan skolla og tvöfaldan skolla á þeirri níundu. Hann sótti í sig veðrið á seinni níu holunum, fékk þrjá fugla á fjórum holum, en fékk tvo skolla í viðbót áður en yfir lauk.
Hann var samtals á þremur höggum yfir pari eftir hringina fjóra, en fyrir lokastöðu sína fékk hann um 600 evrur í verðlaunafé, tæplega 90 þúsund krónur.