Axel Bóasson Keili er einn með forystu í karlaflokki að loknum 36 holum á Íslandsmótinu í golfi á Akureyri. Útlit er þó fyrir mjög spennandi keppni og eru margir um hituna eftir góða spilamennsku í dag.
Axel lék á 67 höggum í dag og er samtals á fjórum undir pari en hann var á parinu í gær. Félagar hans úr Keili, Gísli Svanbergsson og Rúnar Arnórsson, eru aðeins höggi á eftir. Næstur kemur Andri Már Óskarsson frá Hellu á tveimur undir pari samtals. Allir léku þessir fjórir á 67 höggum sem er vallarmetsjöfnun.
Aron Snær Júlíusson úr GKG var með forystu eftir gærdaginn en var á 73 höggum í dag. Hann er jafn Andra Má á tveimur undir samtals.
Arnór Ingi Finnbjörnsson úr GR var einn þeirra sem lék á 67 höggum í dag og er hann samtals á tveimur yfir pari eftir að hafa leikið illa í gær. Arnór, Axel, Gísli, Rúnar, Andri Már og Aron Snær eiga nú saman vallarmetið á Jaðarsvelli eftir breytingarnar: 67 högg.
Uppfært kl 17:41: Birgir Leifur Hafþórsson úr GKG lauk leik á 70 í dag og er samtals á þremur undir pari eins og Gísli og Rúnar.