Íþróttir | Golf | Morgunblaðið | 4.8.2018 | 8:22

Leikið til góðs

Björn Óskar Guðjónsson úr GM lék afar vel á Íslandsmótinu og hafnaði í 2. sæti. Ljósmynd/Golf.is

Hið árlega góðgerðarmót Nesklúbbsins, Einvígið á Nesinu (shoot-out), verður nú haldið í 22. sinn á Nesvellinum mánudaginn 6. ágúst. Venju samkvæmt er tíu af bestu kylfingum landsins boðið til leiks og munu þeir leika í þágu Barnaspítala Hringsins í þetta skiptið.

„Á Barnaspítalanum er veitt sérhæfð, fjölskyldumiðuð heilbrigðisþjónusta fyrir börn og unglinga að 18 ára aldri þar sem í allri þjónustu er áhersla lögð á að greina þarfir og auka vellíðan skjólstæðinga,“ segir í tilkynningu frá Nesklúbbnum.

Mótið verður með hefðbundnu sniði. Klukkan 10 leika keppendur 9 hola höggleik og klukkan 13 hefst einvigið sjálft (shoot-out) þar sem einn kylfingur dettur út á hverri holu, þar til tveir berjast að lokum um sigurinn á 9. holunni.

„Einvígið á Nesinu var fyrst haldið árið 1997 og á þessum tíma hefur Nesklúbburinn komið að því að styrkja félög og samtök, sem láta sig hag barna varða, um rúmlega tuttugu milljónir króna. Í ár ætlar Nesklúbburinn fyrir tilstuðlan velunnara að gefa til Barnaspítalans Hringsins kr. 500.000 í þeirra þörfu verkefni,“ segir enn fremur í tilkynningu klúbbsins.