„Þarf að vera betri á flötunum“

Guðmundur Ágúst Kristjánsson hafnaði í 51.-56. sæti á Thailand Classic á Evrópumótaröðinni en mótinu lauk í morgun.

Hann lék hringina fjóra á samtals 282 höggum (70, 70, 72 og 70) eða á sex höggum undir pari Amata Spring-vallarins.

Þetta var sjötta mót Guðmundar á mótaröðinni síðan hann tryggði sig inn á hana í haust og annað mótið í röð þar sem hann komst í gegnum niðurskurðinn.

Vill ná enn betri árangri

Í stuttu spjalli við mbl.is sagði Guðmundur spilamennskuna hafa verið ágæta og megnið af hans leik ágætt eins og er.

„Ég þarf bara að vera betri á flötunum til að komast hærra upp töfluna.“

Guðmundur, sem komst inn á Evrópumótaröðina í haust, hefur nú komist í gegnum niðurskurðinn í tveimur mótum í röð.

Aðspurður hvort það auki ekki við sjálfstraustið segir hann það bara fínt en hann segist vilja meira.

Hann segir mjög mikilvægt að komast í einhverjar evrur en hann fékk rúmar 7.000 evrur í sinn hlut fyrir að hafna í 51.-56. sæti á mótinu um helgina eða um það bil eina milljón króna.

„Forskot styðja við bakið á mér og ég er mjög þakklátur fyrir það en peningarnir fara fljótt ef maður stendur sig ekki.“

Guðmundur fer nú til Indlands og spilar á Hero Indian Open og þá reiknar hann með því að komast inn á Magical Kenya Open í mars.

„Svo kemur líklega langt hlé,“ segir hann en mörg sterk mót eru fram undan á Evrópumótaröðinni meðal annars Dell holukeppnin á PGA-mótaröðinni og sjálft Masters-mótið, fyrsta risamót ársins.

Guðmundur Ágúst Kristjánsson ásamt Arnari Má Ólafssyni, þjálfara sínum á lokastigi úrtökumóts Evrópumótaraðarinnar í nóvember á síðasta ári. Ljósmynd/Kristján Ágústsson

• Blogga um frétt