Guðmundi fataðist flugið

Guðmundur Ágúst Kristjánsson lauk leik fyrir skömmu á þriðja hring á Hero Indian Open á Evrópumótaröðinni.

Eftir sterka byrjun fataðist honum aðeins flugið en hann lék hringinn á 77 höggum eða fimm höggum yfir pari DLF-vallarins í Nýju-Delí og er í 28.-36. sæti fyrir lokahringinn á morgun á pari samtals á loknum þremur hringjum.

Hér er hægt að fylgjast með skorinu á Hero Indian Open

Guðmundur var fyrir hringinn í morgun meðal efstu manna en Þjóðverjinn Yannick Paul hafði öruggt fimm högga forskot á Guðmund og fleiri.

Paul tapaði tveimur höggum á fyrstu þremur holunum. Á sama tíma fékk Guðmundur fugl á fyrstu holunni og var skyndilega aðeins tevimur höggum á eftir efsta manni.

Fjórir skollar á fimm holum um miðbik hringsins gerðu honum erfitt fyrir og tveir skollar fylgdu svo til viðbótar nokkrum holum síðar.

Guðmundur kom til baka með fugli á 15. holu en fékk tvöfaldan skolla í kjölfarið áður en hann klóraði í bakkann á lokaholunni með góðum fugli.

Guðmundur hefur látið hafa eftir sér að völlurinn sé mjög snúinn og flatirnar eru mjög harðar og hraðar.

Fjórði hringur hefst í nótt og á Guðmundur Ágúst teig um klukkan fjögur á íslenskum tíma í nótt.

• Blogga um frétt