Sögulegur árangur þrátt fyrir erfiða helgi

Guðmundur Ágúst Kristjánsson hafnaði í 48.-53. sæti á Hero Indian Open á Evrópumótaröðinni í golfi. Mótinu á DLF-vellinum í Nýju-Delí er rétt ólokið en aðeins efstu kylfingarnir eiga eftir að ljúka leik.

Guðmund­ur lék fyrsta hring­inn á 68 högg­um eða á fjór­um högg­um und­ir pari og sat í 4.-6. sæti að honum loknum, þrem­ur högg­um á eft­ir Þjóðverj­an­um Yannik Paul sem var efst­ur.

Hann lék annan hringinn á einu höggi und­ir pari og var því á samtals fimm högg­um und­ir pari að lokn­um tveim­ur hringj­um og í 2.-5. sæti, fimm höggum á eftir Paul.

Yannick Paul tapaði tveim­ur högg­um á fyrstu þrem­ur hol­un­um en á sama tíma fékk Guðmund­ur fugl á fyrstu hol­unni og var skyndi­lega aðeins tevim­ur högg­um á eft­ir efsta manni. Guðmundi fataðist flugið eftir það og kom í hús á fimm höggum yfir pari og var þá samtals á pari DLF-vallarins og í 28.-36. sæti fyrir lokahringinn.

Lokahringinn lék hann á sex höggum yfir pari og lauk leik á samtals sex höggum yfir pari í 48.-53. sæti.

Þetta var áttunda mót Guðmundar á Evrópumótaröðinni síðan hann tryggði sér keppnisrétt á þessa sterkustu mótaröð Evrópu í haust. Hann hefur komist í gegnum niðurskurðinn á þremur síðustu mótum Evrópumótaraðarinnar en það hefur engum Íslendingi tekist áður.

Það verður sannarlega gaman að fylgjast með Guðmundi Ágústi á næstu mótum en leiðin liggur næst til Kenía í mars.

• Blogga um frétt