Wyndham Clark leiðir fyrir lokahringinn

Bandaríkjamaðurinn Wyndham Clark leiðir fyrir lokahringinn á Wells Fargo meistaramótinu en leikið er á Quail Hollow vellinum í Charlotte, Norður Karólínu í Bandaríkjunum.

Clark spilaði frábært golf í gær og kom í hús á átta undir pari, samtals á 16 höggum undir pari. Hann hefur tveggja högga forystu á landa sinn Xander Schauffele sem spilaði á sjö höggum undir pari í gær og er samtals á 14 höggum undir pari.

Wyndham Clark hefur aldrei unnið PGA mót á ferlinum og er í leit að sínum fyrsta sigri. Hann hefur einu sinni endað í 2. sæti og einu sinni í 3. sæti. Það þarf lítið að vorkenna honum því hann hefur nælt sér í verðlaunafé sem samsvarar rúmum 1 milljarði íslenskra króna á ferlinum. Sigri hann Wells Fargo meistaramótið þá bætast við það rúmar 492 milljónir íslenskra króna.

• Blogga um frétt