Stjarnan varði í dag bikarmeistaratitil sinn í handknattleik kvenna með því að leggja FH að velli 27:22. Leikurinn var jafn allan fyrri hálfleik en strax á fyrstu mínútum síðari hálfleiks var ljóst í hvað stefndi þegar Stjarnan gaf meira í en FH og landaði Stjarnan loks sigri, 27:22.
Mörk Stjörnunnar: Sólveig Lára Kjærnested 8, Alina Petrache 5/3, Harpa Sif Eyjólfsdóttir 5, Elísabet Gunnarsdóttir 3, Þórhildur Gunnarsdóttir 2, Kristín Jóhanna Clausen 2, Aðalheiður Hreinsdóttir 1, Florentina Stanciu 1.
Varin skot: Florentina Stanciu 20 (þar af 7 skot aftur til mótherja).
Mörk FH: Ragnhildur Rósa Guðmundsdóttir 7/3, Ingibjörg Pálmadóttir 5, Guðrún Tryggvadóttir 4, Birna Íris Helgadóttir 2, Hafdís Inga Hinriksdóttir 2, Gunnur Sveinsdóttir 1, Arnheiður Guðmundsdóttir 1.
Varin skot: Kristina Kvedarine 15 (þar af 4 skot aftur til mótherja).
Fréttavefur Morgunblaðsins fylgidist með gangi mála með beinni textalýsingu.
LEIK LOKIÐ. FH skoraði síðustu tvö mörk leiksins, en það breytti engu. Stjarnan er bikarmeistari kvenna í handknattleik eftir 27:22-sigur á FH.
59. Staðan er 27:20 og sigurinn í höfn. Atli Hilmarsson hefur skipt 6 leikmönnum af 7 úr byrjunarliðinu út af og unglingaflokkur Stjörnunnar leikur nú lokamínúturnar.
54. Sólveig Lára Kjærnested og Florentina Stanciu markvörður Stjörnunnar eru að skila bikarnum í hús í Garðabæinn. Kraftaverk þurfa að gerast til þess að FH komist inn í leikinn aftur. Staðan er 19:26.
50. Róðurinn þyngist enn frekar hjá FH-liðinu því nú hefur Stjarnan yfir 22:16.
46. Stjarnan heldur áfram að auka muninn og Aðalheiður Hreinsdóttir skoraði fyrir Stjörnuna úr öfugu horni, staðan 21:16 og Guðmundur Karlsson þjálfari FH tekur leikhlé.
45. Alina Petrache skoraði tuttugasta mark Stjörnunnar og kom liði sínu í 20:16.
40. Gunnur Sveinsdóttir skoraði sitt fyrsta mark fyrir FH í leiknum og minnkaði muninn í 18:16.
35. Stjarnan eykur muninn enn frekar og er komið í 17:13.
31. Harpa Sif Eyjólfsdóttir skoraði fyrsta mark síðari hálfleiks og jók muninn í tvö mörk fyrir Stjörnuna. Staðan er 15:13.
FYRRI HÁLFLEIK LOKIÐ. Stjarnan hefur yfir 14:13 þegar fyrri hálfleik er lokið. Leikurinn hefur jafn og liðin skipst á að hafa yfir. Alina Petrache er markahæst í liði Stjörnunnar með 4 mörk, þar af 3 úr vítum og Sólveig Lára Kjærnested hefur gert 3 mörk. Hjá FH er Ragnhildur Rósa Guðmundsdóttir markahæst með 5 mörk og þær Guðrún Tryggvadóttir og Ingibjörg Pálmadóttir hafa gert 3 mörk hvor. Þá hafa markverðir beggja liða staðið sig vel. Florentina Stanciu hefur varið 10 skot í marki Stjörnunnar og Kristina Kvedarine varið 9 skot í marki FH.
30. Ingibjörg Pálmadóttir fékk tveggja mínútna brottvísun í liði FH. Stjarnan hefur yfir, 14:13.
26. Ingibjörg Pálmadóttir náði frákastinu eftir markvörslu Florentinu Stanciu í Stjörnumarkinu og jafnaði Ingibjörg metin fyrir FH. Staðan er 12:12 og Atli Hilmarsson þjálfari Stjörnunnar tekur leikhlé.
25. Hafdís Inga Hinriksdóttir skoraði fyrsta mark sitt í leiknum og ellefta mark FH og minnkaði þar með muninn í 11:12.
22. Staðan er nú 10:11, Stjörnunni í vil.
18. Sólveig Lára Kjærnested hefur skorað tvö mörk í röð fyrir Stjörnuna sem er nú komin yfir, 9:8.
15. Markmaður Stjörnunnar, Florentina Stanciu jafnaði metin í 7:7 með því að skora yfir endilangan völlinn.
13. Þórhildur Gunnarsdóttir sem er í byrjunarliði Stjörnunnar í fjarveru Þorgerðar Önnu Atladóttur sem er meidd, hefur nú skorað tvö mörk í röð fyrir Stjörnuna og minnkað muninn í 6:5.
11. Það er FH sem ræður ferðinni gegn ríkjandi bikarmeisturum og hefur FH nú yfir, 6:3, búið að skora síðustu 4 mörk leiksins.
8. Fljótt skipast veður í lofti. FH hefur nú skorað tvö mörk í röð og er yfir, 4:3.
7. Stjarnan er yfir, 3:2 eftir að Kristín Jóhanna Clausen skoraði síðasta mark leiksins fyrir Stjörnuna.
4. Staðan er 1:1 eftir að Ragnhildur Rósa Guðmundsdóttir skoraði úr vítakasti fyrir FH.
1. Alina Petrache kom Stjörnunni yfir með því að skora fyrsta mark leiksins úr vítakasti.