Handknattleikskonan Sunna Jónsdóttir, sem varð Íslandsmeistari með Fram í vor, hefur skrifað undir samning til tveggja ára við sænska úrvalsdeildarfélagið BK Heid.
Sunna hefur leikið með Fram undanfarin tvö ár eftir að hafa komið í Safamýrina frá Fylki. Hún er 24 ára gömul og á að baki 24 landsleiki fyrir Ísland.
Sunna mun koma til liðs við Heid í næstu viku. Hún hefur verið í leit að félagi erlendis og íhugaði meðal annars að fara til Noregs og Þýskalands.
Heid varð í 10. og þriðja neðsta sæti sænsku úrvalsdeildarinnar á síðustu leiktíð. Liðið þurfti því að fara í umspil til að halda sæti sínu en náði því.