Eyjamenn unnu sterkan 23:22-sigur á FH-ingum þegar liðin mættust í Vestmannaeyjum í kvöld. Hákon Daði Styrmisson skoraði sigurmarkið þegar fjórar sekúndur voru eftir en markverðir liðanna voru báðir frábærir með sautján skot varin hvor.
ÍBV var sterkari aðilinn í fyrri hálfleik og leiddi með einu marki þegar gengið var til búningsherbergja. Markverðir liðanna voru ljósasti punkturinn en þeir voru með 10 og sjö skot varin.
Eyjamenn tóku öll völd á vellinum í upphafi seinni hálfleiks og refsuðu FH-ingum fyrir öll sín mistök. Í stöðunni 20:17 tóku Eyjamenn leikhlé sem hjálpaði FH-ingum heldur betur; þeir gripu tækifærið og komu sér aftur inn í leikinn. Stuttu seinna leiddu þeir með einu marki, 20:21.
Phil Döhler dró tennurnar úr Eyjamönnum og var algjörlega frábær. Eyjamenn komust yfir í 22:21 en gestirnir gáfust aldrei upp. Hákon Daði Styrmisson skoraði síðan sigurmarkið fjórum sekúndum fyrir leikslok.
ÍBV er því með fullt hús stiga en FH-ingar með tvö stig eftir fyrstu þrjá leikina.