„Það varð bara að negla á markið“

Hinn 18 ára Þorsteinn Leó Gunnarsson var mikill örlagavaldur á Akureyri í kvöld þegar KA og Afturelding mættust í Olís-deildinni í handbolta.

Frétt af mbl.is

KA henti frá sér unnum leik

Piltur hafði hægt um sig lengi vel en þegar öll sund virtust lokuð hjá Aftureldingarmönnum og staðan var 19:15 fyrir KA þá fór Þorsteinn að fiska menn út af í kippum. KA-menn misstu alveg hausinn og áður en þeir vissu var staðan orðin 19:21 fyrir Aftureldingu. Á spennandi lokakafla var það Þorsteinn Leó sem sá um að skora mörkin og draga stigin í hús. 

Þótti við hæfi að heyra í Þorsteini Leó eftir leik. 

„Ég var frekar kaldur í fyrri hálfleiknum, bara eins og allt liðið en svo kom þetta í seinni hálfleiknum.“ 

Þetta var erfiður leikur fyrir ykkur. Þið voruð alltaf undir, mest fimm mörkum og virtust lengi vel ekkert ætla að fá út úr þessu. Hvað breyttist eiginlega á lokakaflanum? 

„Ég veit það ekki. Það bara kviknaði allt í einu á okkur og sáum að það væri hægt að snúa þessu við og vinna. Við fengum nokkur auðveld mörk og það kveikti á okkur. Við höfum ekki tapað leik á tímabilinu og ætluðum ekki að fara að byrja á því í kvöld.“ 

Þú fékkst nokkra KA-menn út af eftir að þeir voru að brjóta á þér. Þú ert hávaxinn og þyngdarpunkturinn ekki langt niðri. Varstu ekki dálítið óstöðugur í þessum brotum?  

„Þetta voru bara klaufaleg brot hjá þeim og verðskuldaðir brottrekstrar, svona yfirleitt.“ 

Svo varstu bara ískaldur í restina og settir þrjú mörk eftir langar sóknir. 

„Það varð bara að negla á markið. Höndin var alltaf komin upp. Einhver varð að slútta sóknunum.“ 

Hvernig var svo að koma norður í allan þennan snjó? 

„Maður er ekki vanur þessu. Það var -15°C þegar við vorum að koma í bæinn. Þessi kuldi er kannski ástæðan fyrir því að við vorum svona lengi í gang,“ sagði Þorsteinn léttur að lokum.  

• Blogga um frétt