Haukar ekki í vandræðum með Þórsara

Haukar áttu ekki í miklum vandræðum með að vinna Þór, 33:22, í Olísdeild karla í handbolta í dag. 

Jafnræði var með liðunum framan af og var staðan 7:7 þegar fyrri hálfleikur var hálfnaður. Þá tóku Haukar við sér og var staðan í leikhléi 14:10, Haukum í vil. 

Haukar bættu jafnt og þétt í forskotið eftir því sem leið á seinni hálfleikin og að lokum munaði ellefu mörkum á liðunum.

Orri Freyr Þorkelsson skoraði átta mörk fyrir Hauka og Darri Aronsson fimm. Ihor Kopyshynskyi skoraði sex mörk fyrir Þór og Karolis Stropus gerði fimm mörk. 

Með sigrinum fóru Haukar upp í átta stig og upp að hlið ÍBV, Vals og FH í jafnri toppbaráttu, en Afturelding er í toppsætinu með níu stig. Þór er í næstneðsta sæti með tvö stig. 

• Blogga um frétt