Portúgalski markvörðurinn er látinn

Al­fredo Quint­ana, markvörður portúgalska landsliðsins í handknattleik og Porto, er látinn aðeins 32 ára gamall. 

Porto tilkynnti um andlátið á samfélagsmiðlum í dag.

Eins og mbl.is greindi frá á dögunum hneig Quintana niður á æfingu með Porto í Portúgal. Fékk hann hjartastopp og var í lífshættu upp frá því. 

Frétt af mbl.is

Berst fyrir lífi sínu eftir hjartastopp

Alfredo Quintana var vel þekktur hjá íslensku handboltaáhugafólki enda hafa landslið Íslands og Portúgals mæst ítrekað. Liðin mættust þrívegis í janúar. Tvívegis í undankeppni EM. Annars vegar í Portúgal og hins vegar á Ásvöllum í Hafnarfirði. Þá mættust liðin á HM í Egyptalandi en einnig á EM í Svíþjóð í janúar í fyrra. 

Quintana lék allan sinn meistaraflokksferil með Porto og spannaði sá ferill ellefu ár. Hann lék 56 A-landsleiki fyrir Portúgal og hefur átt sinn þátt í því að Portúgal er á meðal tíu bestu landsliða í heimi. Þá er vert að geta þess að Porto er eitt sextán liða sem leika í Meistaradeild Evrópu, sterkustu félagsliðakeppni í íþróttinni.  

• Blogga um frétt