Látum markmenn Aftureldingar líta vel út

Halldór Örn Tryggvason, þjálfari Þórs var að vonum svekktur eftir 36:24 tap gegn Aftureldingu í 12.umferð Olís deildar karla nú í kvöld: „Það sem hefur verið okkar aðalsmerki í vetur er vörnin og markvarsla og það klikkaði í dag. Afturelding gerir vel og við erum oft seinir til baka og getum sjálfum okkur um kennt.“

Í byrjun seinni hálfleiks minnkuðu heimamenn muninn í tvö mörk en eftir það gekk afar brösuglega að skora mörk og Afturelding leit aldrei til baka. Aðspurður um þetta sagði Halldór:

„Við þurfum að skoða þetta betur og sjá hvað gerist. Við reynum að fara í sjö á sex, breyta aðeins til og reyna að krydda þetta upp. Við erum að æfa vel og þetta er enn og aftur bara hausinn á mönnum.“

„Við erum með 22 klikkuð færi, við erum að láta markmenn Aftureldingar líta vel út í dag. Með lélegum skotum. Klikkum á þremur vítum sem er allt of dýrt í leik sem þessum.“

Mikið hefur verið talað um leikjaálagið í deildinni undanfarið. Aðspurður um hans skoðun á þeim málum sagði Halldór: 

„Þór Akureyri var eina félagið sem sendi inn póst á HSÍ og viðraði áhyggjur af þessu. Bentum góðfúslega á þetta og sendum inn tillögur um hvað mætti gera en það strandaði þar hjá HSÍ. Þetta álag er ekkert eðlilegt en lítið hægt að breyta því núna.“

• Blogga um frétt