Ólafur og félagar byrjuðu á stórsigri

Kristianstad byrjaði úrslitakeppnina um sænska meistaratitilinn í handknattleik með miklum látum í kvöld þegar liðið vann stórsigur á Malmö á útivelli, 32:22.

Malmö endaði í þriðja sæti úrvalsdeildarinnar en Kristianstad í sjötta sæti en það var ekki að sjá á leiknum í kvöld. 

Kristianstad var með yfirburðastöðu í hálfleik, 15:7, og var með leikinn í hendi sér eftir það. Mest munaði ellefu mörkum í seinni hálfleiknum.

Ólafur Guðmundsson var næstmarkahæsti leikmaður Kristianstad í kvöld með 6 mörk en Markus Olsson skoraði 7. Teitur Örn Einarsson lék ekki með Kristianstad í kvöld.

Liðin mætast næst á laugardaginn en þrjá sigra þarf til að komast í undanúrslitin.

• Blogga um frétt