Ámælisvert að lið tapi viljandi

Þórir Her­geirs­son fer með lið sitt, norska kvenna­landsliðið í hand­knatt­leik, á Ólymp­íu­leik­ana í Tókýó í sum­ar eft­ir harða bar­áttu í undan­keppn­i sem hann vonast þó til að taka aldrei aftur þátt í.

„Það er enginn tími fyrir undankeppni Ólympíuleikanna hjá besta handboltafólkinu í dag, það þarf að úthluta löndum þátttökurétti á leikana út frá árangri á Evrópumeistaramótinu og öðrum álfukeppnum,“ sagði Þórir í viðtali við norsku sjónvarpsstöðina TV2.

Þá bendir Þórir á að lið hafi getað tapað leikjum viljandi á síðasta heimsmeistaramóti til að fá þægilegri riðil í undankeppninni. „Ein af ástæðunum fyrir því að hætta þessari undankeppni er að lið vita hverjum þau geta mætt fyrirfram. Þá geta lið gert eins og sum gerðu á HM í Japan og tapað ákveðnum leikjum til að reyna að lenda í þægilegri riðli í undankeppninni. Það er gríðarlega ámælisvert.“

Þórir og norska landsliðið verða með Angóla, Suður-Kóreu, Svart­fjalla­landi, Hol­landi og Jap­an í A-riðli á Ólympíuleikunum í sumar.

• Blogga um frétt