Bjarki laus við veiruna en engir sénsar teknir

Landsliðsmaðurinn Bjarki Már Elísson var ekki með Lemgo er liðið vann 29:27-sigur á Minden í þýsku 1. deildinni í handbolta í dag. Hornamaðurinn er nýkomin úr einangrun eftir að hann greindist með kórónuveiruna. 

Hópsmit kom upp í herbúðum Lemgo og var Bjarki einn sjö leikmanna liðsins sem greindust með veiruna þann 23. mars síðastliðinn. Var tveimur leikjum Lemgo frestað vegna þessa og mátti liðið ekki æfa í rúmar tvær vikur.

Bjarki fékk loksins grænt ljós á að hefja æfingar á nýjan leik á föstudaginn var, en landsliðsmaðurinn staðfesti í samtali við mbl.is að hann hafði ekki æft í 20 daga eftir smitið og því var tekin sú ákvörðun að hann yrði ekki með í dag. 

Bjarki kveðst vera við góða heilsu í dag og vonast hann til að taka þátt í leik Lemgo og Coburg næstkomandi laugardag. 

• Blogga um frétt