Íþróttir | Handbolti | mbl | 17.12.2021 | 19:29

Stórsigur Stjörnunnar í Eyjum

Pétur Árni Hauksson sækir að Eyjamönnum í kvöld. Ljósmynd/Sigfús Gunnar

Leó Snær Pétursson var markahæstur Stjörnunnar þegar liðið vann ellefu marka stórsigur gegn ÍBV í úrvalsdeild karla í handknattleik, Olísdeildinni, í Vestmannaeyjum í þrettándu umferð deildarinnar í kvöld.

Leiknum lauk með 31:20-sigri Garðbæinga en Leó Snær skoraði níu mörk í leiknum, þar af fjögur af vítalínunni.

Jafnræði var með liðunum í fyrri hálfleik og var staðan 12:11, Stjörnunni í vil, í hálfleik. Garðbæingar keyrðu hins vegar yfir Eyjamenn í síðari hálfleik og fögnuðu öruggum sigri.

Björgvin Hólmgeirsson skoraði sjö mörk fyrir Stjörnuna og þá átti Brynjar Darri Baldursson stórleik í markinu og varði 20 skot.

Dagur Arnarsson var markahæstur Eyjamanna með fimm mörk og Björn Viðar Björnsson varði tólf skot í markinu.

Stjarnan fer með sigrinum upp í annað sæti deildarinnar í 18 stig en ÍBV er í fjórða sætinu með 17 stig.